2017年5月19日
特朗普上場4個月已經講緊會唔會被彈劾,破晒紀錄,佢當選後令市場咁興奮,美股美金都上升,等待好消息;而家美金幾乎打回原形,美股會唔會跌掉過去半年升幅?巴西股市因為總統醜聞,下跌一成融斷。政治事件係可以大大影響股市,尤其是美股上升全靠期望有政治助力,特朗普可以拉升美股,又可能推冧美股,全世界俾佢玩殘。
瑞聲(02018)終於頂唔順要停牌,頂唔順唔係大股東冇錢頂唔住個股價,而係頂唔順沽空機構嘅質疑,要時間諗點去回答。瑞聲投資者最怕嘅,唔係指控入面嘅關連公司是否屬實,而係蘋果係咪會真係走去調查,萬一蘋果cut單,又或者見你咁好賺, 撳價,瑞聲隨時被剔出藍籌行列。如果連藍籌股都會長期停牌,又或者跌個九成,恐怕那些老千股名單,又或者幾十隻不能買的股票,要寫多幾版紙。
呢個世界,冇鬼唔死得人,沒有無緣無故的愛, 亦沒有無緣無故的恨。點解沽空機構會揀上瑞聲?藍籌股唔係純粹市值夠大就可以變身成分股,就算BB股升上一萬億市值,都唔會變成藍籌。瑞聲有好長嘅往績,市值夠晒堅挺,成交扎實,先可以成為藍籌股。
沽空機構咁多老千股同不能買股唔去調查,調查一隻藍籌股?而且,沽空機構所搵到嘅證據,係中文,唔會係鬼佬無意間發現到蛛絲馬跡,走去發掘調查,唯一可能,係有人告密,知道內情,聯同沽空機構做世界;否則的話,任你IQ幾高,有乜可能隨手揀隻股票,俾你睇吓公開資料就發現到破綻,走去調查,仲要俾你搵到證據?
所以,沽空機構最叻嘅唔係有分析能力,係識得人多,某程度上,佢哋在發表報告前沽空,都係掌握了內幕資訊,唔係單憑佢哋嘅研究結果。唔好咁天真,佢哋唔係價值投資者,唔係睇年報發現有古怪走去沽空,係知道一啲外面唔知嘅資訊,提早沽貨,再踢爆賺錢。至於佢哋掌握嘅資訊係真定假,唔重要,因為你想反駁前,都已經要跌到停牌。
訂戶登入
下一篇: | 虛有其表的國度 |
上一篇: | 「滬港通」及「深港通」上日收市統計 |