熱門:

2016年10月20日

方卓如 方如玉帥

點人數不如搵路數

宣誓嗰日唔計,第一日開會就流會。唔好忘記, 兩邊人數唔差得好遠,隨時次次開會都點人數,日日流會。假以時日,市民接受流會係新常態,同見得太多例如政府告立法會呢類荒謬事件一樣,漸漸麻木。老早知道立法會唔係攞嚟做正經事,只係估唔到第一日開始已經玩到盡,失敬。

有啲人覺得一句話唔啱聽就要追殺,但更多人覺得程序唔公義打橫行就係與民為敵。搞得愈亂有人愈開心,墮入圈套,監倉內互相分黨分派撕片,人哋夜晚睇電視真係笑到瞓唔着。睇怕嚟緊5年都係冇運行,學習吓歷史,如何响亂世自處而唔發癲是為上策。

香港人走出去係未來唯一出路。以往唔使諗呢條路,因為香港本身夠做。做到極限,又有大陸市場畀你做。但係一個城市嘅地運,就好似黑雨之下一部無助嘅電單車一樣,要俾洪水沖你走你都冇符。香港市場同大陸市場,香港人都會俾洪水沖走,企都企唔穩。走出去搵碇企,係好正常嘅事。

唔係叫你移民,移民係好悲哀嘅兩隻字,比讀錯China發音嗰兩隻字更難聽。移民係你要放低擁有嘅嘢,起錨,重新適應,揸頸就命,低聲下氣,由低做起等等。甚少人係開心移民,隨非你嫁人,梗係你鄉下搵唔到食你先至無端端走去移民。叫你走出去,係你去人哋嘅地方打江山,賺外滙。

香港人走出去容易過內地人,至少你識少少英文,難免有少少地區例如鴨脷洲口音。香港生活逼人,屋企廁所連門都閂唔埋,洗手都冇地方。走出去拚搏,拚搏嘅環境隨時比香港好,心情愉快,拚搏特別起勁。而且,香港人面對慣了惡劣嘅拚搏環境,拚極都唔夠交租,賺份糧都未夠。走出去,輕易搵兩餐晏仔,踩行油就有合理回報,仲唔瞓身拚個你死我活?香港人喺香港唔夠人狠,去到外面就顯得狠過其他人。

香港啲叻仔都身體力行走出去撈世界,與其日日喺香港見人點人數,不如行遠啲走去搵路數。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads