2016年9月12日
美國稍為有聲氣可能加息,已經足以令美國股市向下調整。脆弱成咁係絕對唔正常,因為加息預期係深入民心,一定會加,只欠落實時間。一句有機會加息嘅說話就推冧幾百點,證明踢到咁高嘅棚係非常不堪一擊,少少風吹草動就爭相走鬼。
大跌之前需要有一連串大升,跌落嚟先有力度。自從英國公投脫歐之後連續3個月都不停升,已經儲夠能量嚟一次調整甚至大跌,視乎觸發下跌嘅事件有幾大威力。
香港接連打了幾口補針,先有「深港通」,再有內地保險公司可藉「滬港通」買港股,呢兩個消息其實係去年大時代嘅翻版,足以炒到上天。
買落贏面大過上
只係山頂價係唔會相隔太近,今年唔會再有大時代價,港股沒有再谷上嘅藉口,買落贏面大過買上。
《經濟學人》都提到香港立法會選舉,本土派有驕人成績。一如其他文章,對認識全世界,《經濟學人》提供一個唔錯嘅入門同有觀點嘅分析。但對題目有深入認識嘅讀者,《經濟學人》嘅分析就非常片面,到喉唔到肺,講咗等於冇講。唔信,睇吓今期佢點講香港立法會選舉,你就可以印證,其他文章你覺得有深度只係因為你對題目認識不深。反而,我對上期嘅一篇書評就有好深印象。呢本書係講及無論你對世界發展如何悲觀,無可否認人類生活喺各方面都係大幅改善。
作者係瑞典人,瑞典喺150年前仲窮過今日嘅埃塞俄比亞,今天梗係不可同日而語。香港人會唔會有同感?雖然香港人買樓愈買愈細,但唔買樓嘅話,香港人未必要住得細。就算住細咗,屋入面都比以前同等面積嘅樓住得豪咗。劏房式住宅之所以有市場,係因為香港人點窮都要買樓。窮,自然買劏房樓。
人類生活係不斷進步,但係你人生只有單一目標嘅話,無可避免地局限了改善自己生活嘅機會。就算股市大冧,你都唔會有子彈入市,因為你成副身家供樓。
人類生活不斷改善,前提係,你要有改善生活嘅意志。
訂戶登入