2016年8月25日
股票唔多人搶,市場而家搶選票。金融服務界選舉比預期中激烈,全靠一份上市改革諮詢文件,令業界知道大禍臨頭,唔可以選個唔幫業界不特止,仲要幫外人踩多腳,慌你唔死嘅代表。
點解上市改革咁大鑊?因為港股A股化最危險就係香港證監變成中國證監,而家就係向呢個方向進發。香港股票市場同投資者本來係成熟過A股,但反過來而家港股要倒退變成A股去保護投資者。點解中國公司要嚟香港買殼?因為內地上市要中證監批,中證監控制源頭,唔畀太多公司上市,排長龍,眾所周知。你想香港學大陸,上市由證監批?仲唔係倒退?
賣殼逃生
有說而家有雙重存檔,上市都要過香港證監,改革只係微調,冇分別。大錯特錯,混淆視聽!而家證監要殺掉一個上市申請,總要找個理由,有個說法;將來,證監唔批,係會議內部討論結果,會議保密,毋須要畀理由。結果係,香港變成A股B隊,香港變成中國,好多嘢發生係唔使講理由。
好多人忽略咗,上市唔單只係公司IPO,公司增發股票都係要上市批准。中國大陸,呢啲叫定向增發,一樣要中證監批。將來上市改革,公司批股,又要香港證監批,仲唔係A股化?
以後香港股市,上市唔得,賣殼唔得,批股唔得,咁嘅市場,將香港股市閹割掉,變成男女人鬼不分嘅偽A股市場,你唔覺得有問題?可以唔驚?
香港散戶唔係大陸散戶,唔使保護到只准買藍籌收息。你見到有好多炒到天價嘅股票,你估散戶會買咩?佢哋會衝入去買天價嘅BB股?無可能。
反而那些奄奄一息嘅細價股,你唔畀佢賣殼,散戶小股東就真係冇仇報。咁多上市公司蝕錢,你可以話佢經營不善,又可以話佢不務正業,但有一個更大原因,係而家香港同大陸都冇乜生意好做呀!做邊行都死,上市公司想正經做生意都唔容易。你唔畀佢搵主好人家入局,大小股東都係焗輸,等供股夾錢救命。賣殼其實就係保障小股東有逃生機會。
證監意志
最重要係,上市規則寫到明上市資格,白紙黑字。法治社會,唔係跟足字眼就係合格上市咩?點解會有證監意志可以判斷公司唔適合上市?如果賭業股都可以上市,還有什麼合法生意係唔適合上市?大股東規定一年唔准賣,點解要人自願3年唔賣?人治社會,跟足規矩都唔得,仲有長官意志,係香港人可以接受咩?到你唔驚?
香港嘅「一國兩制」,其實只係剩番股票市場「一國兩制」。而定港股變成A股B隊,監管同遊戲規則模仿A股,香港人再冇立足餘地。香港唔會死,但香港人可以死。證監要行A股模式,玩死晒香港人,唔怪得業界咁努力去拉票。證券行老闆要我寫啲開心嘢,佢上晒岸,腦筋轉得又快,梗係開心。
香港人,俾人一刀一刀逐忽肉鎅開,諗到呢度,我要抹一抹眼角。
訂戶登入