熱門:

2016年4月26日

方卓如 方如玉帥

兩個人又嚟

杜如風又嚟,又有日本旅遊指南。唔好睇小呢類攻略,高難度。日本邊個唔係去到爛?一年咁多個long weekend,香港人只有日韓泰嘅選擇,你本比英籍護照差少少嘅特區護照一定蓋滿了日本入境印。

要搵一啲仲有電視介紹價值嘅地方,較設計一個藉口炒掉睇晒成份報紙嘅執行總編輯難度高百倍,至少你唔可以話我係你老細,我話邊度好玩就好玩,明冇?

大阪適合年輕人,京都屬於中年人。而家咁多中年人放逐自己去京都,就係嫌香港嘈,想去靜吓,透透氣。但係自從日本開放大陸人入境旅遊消費,京都已經唔靜。

清水寺上山條商店街,旺過旺角,人貼人。千年古剎,木建舊寺,唔預計香火咁鬼鼎盛。嵐山竹林,無晒秀氣,有竹都令人覺俗。俵屋,Steve Jobs最愛嘅京都旅館,佢住過嘅就係4號房「富士」,位於地下,外有庭園。但可惜,你身處京都,又點會留在旅館?仲有,俵屋四周有工程進行中,抬頭望是天秤吊臂,好似「時光倒流七十年」嘅硬幣,雖然房間內令你錯覺處於江戶時期,但仰望上天就提醒你身處廿一世紀昏暗年代。

鬼佬唔了解中國國情

索羅斯又嚟,話中國債務規模之大,令佢想起2008年金融海嘯前嘅美國。沽空中國可能稍為收斂,但肯定直至爆破嘅一日都唔會停,因為全世界只係得中國未試過信貸爆破。上年A股係由高位急速下跌,但係只係股票令人損手,孖展斬倉,未有大規模信貸危機。而家中國債務超過GDP兩倍,超日趕美,大鱷認為遲早有一日輪到中國信貸爆破。

唔識國情嘅鬼佬係唔會了解中國,重唔明白中國有自己嘅一套定律。美國同日本係民主國家,有自然規律、人類行為,但係中國全部同一個姓,市場係跟另一套規律。中國債務規模以GDP增長率嘅兩倍速度上升,但係債轉股係可以令債務以斷崖式速度下降。

而且,中國真正做到藏富於民,必要時係可以動用民間財富,例如准買禁賣,要求你買。你用政府嘅儲備去比較中國嘅債務,係嚴重低估中國消滅債務嘅能力。外國估計中國一係重蹈美國嘅覆轍或者步日本嘅後塵,可能係,但正如我所說,太早估中慘過估錯,唔好以為自己好聰明。

 

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads