2015年10月10日

畢老林 投資者日記

油價送新興市場一程

10月9日，周五。今午在公司水吧跟大編輯偉記打個照面，對方hi都唔say劈頭便問：「新興市場有冇一個月貨仔玩？」問得好，但老畢如果識答，仲使做？

世事就是這樣，跌時愈殘愈見鬼，升時冇貨最閉翳。美股在肉酸到痹的9月份就業數據公布當晚（10月2日），好有氣勢咁嚟個單日轉向拗腰反彈，之後幾個交易日即使早市下跌，午後仍能扭轉劣勢升住嚟收，一改之前虎頭蛇尾的模樣。這種走勢告訴大家，投資者已由逢高減持變為逢低吸納，信心膽量逐步恢復。

一個月貨仔？

回思偉記的問題，老畢雖然唔知答案，但以新興股市跟油價相關性之高，油價若見了底，新興市場反彈該不會短癮到一個月貨仔都冇。

大家如果有留意新興市場以至港股與油價走勢的相關度，想必發現MSCI新興市場指數（紐約上市ETF代號EEM）於9月28日（上周一）觸底，當天為中秋節翌日，港股休市，但恒指9月29日復市收報20556點，隨後八個交易日累升近一成。美股9月29日開市後，追蹤標普500指數能源板塊的ETF（紐交所代號XLE）亦告見底，數個交易日內累漲15%。

老畢年初嘗試在美國石油板塊抄底，油價、油股全年大起大落，買入的股票整體上輸多贏少，但對油價起伏卻有第一身感受。回看今夏環球股市大震盪，最戲劇性的一天乃8月24日，道指當晚開市閃跌千點，「恐慌指數」VIX一度升穿50水平。紐約期油同日曾跌至38美元，穿了1月和3月淡友屢攻不下的40美元水平。可是，油價在40樓下維持時間很短，未到9月已收復此一關口，整個9月份於44至47美元橫行，走勢上形成敏感三角形【圖1】，期間高盛出報告唱油價見20美元，中國經濟給講到有咁差得咁差，但紐約期油始終只在上述範圍窄幅爭持，壞消息無法令油價再度踩至40美元樓下，本周紐約期油果然爆上。

博大霧成功

在整個過程中，油股表現很「有趣」，有貨在手者肯定像老畢那樣，別有一番滋味在心頭。從【圖2】可見，追蹤標指能源板塊的XLE，於8月24日道指「閃跌」當天傷亡慘重，由於市場大亂且沒有莊家維持秩序，許多股票在全無承接下跳價狂瀉，放個近乎發夢的低價盤求入，分分鐘博大霧成功。可是，有人以超筍價撈貨得手，等於有人以超殘價蝕讓，人心惶惶下，斬倉斬到滿地鮮血，事隔雖已個多月，老畢記憶猶新。

與油價有別，XLE隨後雖也反彈，但整個9月份反覆尋底，一度逼近8月24日低位，個別油股更跌穿。不少投資者守都費事守，索性沽貨套現離場。

Capitulation從來都是這樣，當大家連最後一絲希望亦幻滅時，資產價格往往就此見底。恒指、新興市場、能源股，約都冇咁啱，9月28/29日同步觸底。從【圖2】可見，XLE本周升穿4月高位至10月初的下降軌，技術上出現突破。

剃美國眼眉

好多嘢都係搵嚟講，當淡友佔上風時，中國經濟、世界需求像錄音機般給你來個疲勞轟炸，冇人理會美國rig count。好友回足氣反撲，全世界又話rig count係咁跌，美國石油供應冇可能唔回落，加埋俄羅斯介入敍利亞內戰、突襲「伊斯蘭國」據點，明剃美國眼眉，地緣政局加柴添火，有心人似在借油價送新興市場一程。

放大圖片 / 顯示原圖

下一篇：	超級芬佬也被摑到面腫
上一篇：	香港股市周五收市統計