收納師黃潔賢教執屋驅除心魔
生活企理幸福滿載人人「愛回家」

香港居住環境狹窄，儲物空間有限，人們則喜歡購物，常要為如何安放家中雜物而傷腦筋，「斷捨離」近年成為解決方法之一。MCM專業收納服務創辦人黃潔賢（Kitty），本身是三孩之母，又要協助丈夫打理生意，百忙中還抽時間開拓收納事業，只因相信家居環境與精神健康息息相關。她受訪時強調，很多人囤積雜物往往出於心理因素，收納正要為他們「驅除心魔」，絕非執屋清潔般簡單。

讀商科出身的Kitty，畢業後曾於律師樓任秘書，性格好動的她只過了數月，就感到「朝九晚五」生涯不適合自己，毅然轉跑道「沖上雲霄」，考入日航當空姐，「嗰陣年輕，覺得周圍飛幾好玩」，結果她從1994年做到2001年，完成放眼世界夢想後，認為是時候「腳踏實地」，遂跟隨當時男友（現任丈夫）學習從商。

Kitty丈夫的家族經營電纜供應和火牛掣櫃企業，主要客戶包括港燈（02638）及中電（00002）等，她加入後由文職做起，「（工作）性質並非朝九晚五，係Marketing（市場推廣）、HR（人力資源）嘅嘢，變咗flexible（彈性），同埋我之前份工（空姐）係同人溝通，所以想藉呢個機會做一啲係文職但又有得同人交流嘅工作，唔係齋睇文件。」

此後Kitty邊做邊學，逐漸培養出對從商的興趣，「幾得意同有挑戰性，當你做一樣嘢有成功感、滿足感，自然就會鍾意。雖然我唔係『engine（工程）底』、盲摸摸，不過我又唔驚，因為主要負責對客戶，真係technical（技術性）嘅嘢就問返老公或同事，當然自己都要惡補（相關知識），譬如帶人出trip（海外公幹）見廠家，如果唔識嘢，人哋會質疑你，無辦法，唯有死記爛背。」

至於接觸收納行業，約始於數年前，有見於丈夫公司生意穩定，「我一向學埋啲奇奇怪怪、同本身（任職）行業無關嘅嘢，例如畫畫、wakesurf（無繩滑水）；其實我細個已經成日執嘢，有次去日本發現原來收納都有得讀，仲有得考牌，朋友話日本好流行，咪膽粗粗報名學，二級、一級咁上，然後發覺美國又有，我想知同日本嘅理論、方法有咩唔同，於是走去學埋。」

學懂理論還要隨機應變

Kitty形容一般收納課程入門不難，可是讀上去到講師級，老師會非常嚴格，「你（考講師牌）去教人，唔可以教錯，同埋你要對個概念、理論好清晰，清楚話畀人聽。」然而書本理論往往只屬紙上談兵，真正實踐隨時是另一回事，「所以要識隨機應變，始終間間屋唔同，呢樣嘢要靠實習，累積經驗。」

對收納業有熱誠，大概也跟Kitty個人性格有關，「屋企我一向都執，（家具雜物）得閒換吓位，慢慢開始幫吓朋友，問人哋可唔可以畀我試。呢個都係我由細到大嘅習慣，執書包、書枱、衣櫃，所以我好少帶漏嘢，功課永遠唔會遲交，呢啲都係執得好所帶來嘅幸福感，我份人組織性幾強㗎，哈哈！」

如此認真，可會有強迫症？「我覺得有啲（笑），例如iPhone啲訊息，好多人唔會睇晒，由得佢好多個圓圈，我係一個圓圈都唔可以有，一定睇晒，唔要嘅即刻delete（刪除），日日清，否則見到啲圈會好忟憎，（那對子女是否同樣高要求？）咁又無喎，我覺得係潛移默化，佢哋自細見到媽咪唔鍾意亂擺嘢，細個時候無手尾我會幫，慢慢就識自動自覺執房。」

「有時見到朋友個廚房（凌亂），會忍唔住問點解咁嘅？跟住問可唔可以試吓幫佢，所以朋友可能好怕我去佢哋屋企，我一去到會問『做乜買咁多包米粉呀』，又唔係特登『哦』佢嘅；亦有啲朋友提出，『唔掂，屋企真係好亂，你可唔可以幫吓手』，我都會做。」Kitty笑說。

做好斷捨離效果更持久

為別人處理收納過程中，她漸漸意識到很多人不捨丟棄雜物並非因懶或無時間，反而是心魔作祟，如收納障礙或囤積症，好學的她於是積極進修心理學知識，「曾經幫啲失婚婦人（收納），佢放唔低（從前一段感情）、非常執着，乜都唔想掉，又或情緒好唔穩定，我要先解決佢個心理問題先至再幫佢執，因為我唔可能日日幫，就教佢方法，等佢做返自己嘅收納師。」

斷捨離聽來簡單，對不少人來說知易行難，Kitty建議先做好「心理上的斷捨離」，否則即使當下聽從收納師意見丟掉雜物，隨後也可能「靜靜雞執返」，故最重要弄清「有咩要有咩唔要」才開始整理，「我（收納師）逼佢做某樣嘢，效果都唔會維持得耐。」

具心理療癒盼多助基層

她又表示，本身正職已頗穩定，故希望收納公司可從事更多慈善服務，包括為該些團體或非牟利機構提供免費或優惠價等，「執屋時遇過唔少老弱婦孺或基層人士，我更想去幫呢班人，佢哋未必有閒錢幫襯收納公司，甚至覺得，『吖！我做乜唔自己執，要咁巴閉去請公司。』」

「其實收納唔係淨係執嘢，或者做鐘點清潔，而係教客人有系統地去處理，令佢生活過得好啲、舒服方便啲。我幫得最多係香港單親協會嘅婦女個案，即使做義工都唔介意，唔止幫佢哋執屋，仲會開講座教嗰啲媽媽，點樣繼續維持佢哋屋企個整理收納程度。」Kitty如是說。

收納不單是一門學問，也可提升家的舒適度，具有心理上療癒效果；企企理理，自自然然「愛回家」。

採訪、撰文：許鎮邦

攝影：黃勁璋、受訪者提供

下一篇：	時間分配得宜工作嗜好同兼顧
上一篇：	模擬工作平台讓學生體驗百業

文章：

收納師黃潔賢 教執屋驅除心魔生活企理幸福滿載 人人「愛回家」

收納師黃潔賢教執屋驅除心魔
生活企理幸福滿載人人「愛回家」