熱門:

2022年11月7日

周一人物

黃馮慧芷感同身受援助留院病童
麥當勞叔叔之家主席 供臨時住宿免奔波

兒童患病留院已屬不幸,親人舟車勞頓往來陪伴更是身心俱疲;1974年成立的全球麥當勞叔叔之家慈善基金(RMHC),致力支援病童及其家屬,讓他們更有力量面對逆境;RMHC於1996年登陸亞洲首站香港,現任的本港主席黃馮慧芷(Grace)本身為資深銀行家,轉跑道到慈善機構,秉持「家庭為本」理念,以國際視野照顧本地需要,不單提供資源,更想帶來安慰和希望。

香港RMHC的核心項目是沙田多石街家舍,毗鄰威爾斯親王醫院,為留院治療的基層病童及其家庭提供臨時住宿;說到這機構的歷史背景,不得不提已故「香港麥當勞之父」伍日照(Daniel),他1975年在銅鑼灣百德新街開設本地首間麥當勞,是日後引入RMHC的幕後推手。

設施毗鄰威院 秉持「家庭為本」

「其實Daniel開頭做RMHC時,好多人話,香港咁細,美國、澳洲啲細路仔喺農場跌親,要去大城市醫,咁遠先有需要,但Daniel覺得如果你係家長,一分鐘都太耐,每多一分鐘路程就多一分痛苦;萬一由屯門、天水圍嗰邊過嚟沙田,至少45分鐘,你諗吓小朋友若然要做Chemo(化療),山長水遠(去威院),做完一輪(化療)都散晒攰晒,返屋企第二朝又要嚟,真係好苦好苦。」Grace嘆謂。

本港居住環境狹窄也是另一難題,多口之家迫在蝸居的情況甚為普遍,「所以好多醫生十分支持我哋,咁辛苦醫好個小朋友,梗係想佢哋有個好啲嘅地方復元,而醫院又可以騰出床位,畀其他(病情)更嚴重嘅小朋友。」

至於Grace與RMHC結緣,源於2008年她仍任職渣打銀行,與麥當勞素有業務來往,適逢香港RMHC舉行年度籌款晚宴,誠邀Grace「買枱」支持,宴會當晚她才認識這機構,「之後好榮幸,Daniel邀請我加入。」她直言此前了解有限,「只係平時入去(麥當勞)買包,見到有個捐款箱,我一向對(幫助)小朋友都有興趣,從1984年開始每年捐錢畀保良局,一直到而家。」

幼時赴英做手術 深明箇中恐懼

對關心病童如此志同道合,大概也與Grace自身經歷有關,「我細個成日病,住過醫院,好明白小朋友嗰種盼望;同埋我天生兔唇,7歲時候去英國做手術,唔係好識講英文,住醫院得個驚字,又見唔到你最親愛嘅人(父母),所以我好明白有幾恐慌,希望屋企人喺身邊;自己亦係母親(有一名兒子),更加清楚小朋友嘅感受,因此對RMHC好有共鳴。」

她又提到,小時候因體弱多病經常看醫生,「入到醫務所,裏面有間房,你細路仔就捉咗你入去,父母唔該喺外面,小朋友梗係喊啦,真係好恐懼,因為你唔知幾時要打針,醫生就永遠同你講唔使驚、無嘢嘅,然後就失驚無神打你一針,好嬲好嬲,覺得佢(醫生)呃你吖嘛!呢啲經驗畢生難忘。」

這份「童年陰影」,促使Grace致力實踐香港RMHC使命,「專注兒童關鍵需要,創設、尋找及支持可直接改善兒童健康及福祉的計劃。」最重要做到「以家庭為本」,因為當小朋友患重病,對家庭來說可能產生巨變,「精神壓力固然大,擔心個小朋友唔知有咩事;仲有財政壓力,醫藥費、交通費,點算呢?甚至要辭咗份工去照顧個小朋友;我哋好想支持父母,等佢哋做出正確選擇,呢個係我哋核心價值。」

Grace在2008年9月加入香港RMHC即出任主席,惟承認當年不算積極參與會務,「內疚,一直feel bad(感覺糟糕),所以而家更想做多啲。」幸好當年身為榮譽主席的伍日照仍然活躍,一切會務均安排妥當,直到2013年他離世後,Grace自然要接手,翌年11月她退休離開銀行界,進一步全情投入慈善工作,2015年更成為全球RMHC董事會首位亞洲人委員。

心靈滿足非物質回報可比

由銀行轉到慈善機構,Grace形容感覺差天共地:「尤其我以前做investment banking(投行業務),P&L(損益)、業績係首要任務,同埋銀行事事迫切,一日24小時叫到,你即刻就要做,即使放緊假喺L.A.(洛杉磯),有deal(交易)都要即刻飛返嚟,你一係做,一係唔做,無其他選擇。」

「仲有,做銀行reward(回報)得一種,個個都梗係睇錢啦;喺呢度(香港RMHC)唔一樣,個reward好難量化,不過嗰種sense of achievement(滿足感),覺得幫到人,講真我以前賣bonds(債券),賣咗十幾年先轉corporate finance(企業金融),都未見過張bond嘅,從來唔使接觸,講電話之嘛,做外滙亦都係,全部數字;呢度就真係見到啲(病童)家庭,有一班好熱心嘅(工作)團隊,個個有血有肉。」Grace如是說。

無論任何回報,都是努力的成果,然而相比物質上的滿足,心靈愉悅更難能可貴。

採訪、撰文:許鎮邦

攝影:黃勁璋、受訪者提供

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads