熱門:

2022年9月26日

周一人物

四孩之母ViVi變身直播帶貨教主
開甜品店曾清袋 轉戰電商推銷時尚

衣食住行與市民生活息息相關,從創業角度看,前二者入行門檻較低,但有得必有失,競爭難免較大。像本地休閒生活電商平台Mixx Collection創辦人陳沈忻(ViVi),18歲經營時裝店,此後一直遊走衣、食兩行業之間,試過開甜品店「一鋪清袋」輸掉600萬元,4年前雖已是四孩之母,仍毅然轉戰直播帶貨成功翻身,被稱「時尚直播教主」,她認為創業只要堅持信念、永不放棄,未來必定可期。

有四分之一法國血統的ViVi生於創業世家,家族經營服飾生意、全港有近20間分店,耳濡目染下,她14歲在祖業幫手時,已決心一到成年就成立自己公司,且說到做到,18歲她從事時裝零售批發生意,「屋企人無刻意栽培,純粹自己覺得好玩又賺到錢,計到屋企人賺幾錢,咁一個18歲女仔(創業),唔係賣衫就飾物啦,最易入手。」

開時裝門市 難敵網購潮

適逢沙士後不久,商舖租金低迷,ViVi趁低在旺角中心開設第一間門市,「係一樓樓梯位旺舖,之前講緊三四萬(租)一個月,嗰陣我7000蚊就租到,奇蹟嚟!對我哋想創業嘅年輕人簡直係最好時機,兩三萬(成本)已開到舖,而一日生意額過萬,未夠半年就夠錢開第二間(分店),之後最多開咗10間。」

可是到了2008年,她開始發現時裝生意難做,翌年營業額更恐慌性一落千丈,「online(網上購物)愈來愈蓬勃,加埋淘寶(搶客),好多原因」,於是她萌生撤退念頭,將實體店規模逐漸收縮,10間變6間、3間,最終全線結業,「但創咗業咁多年,好難去打工,自己性格亦未必適合,不如試吓轉餐飲(行業),應該無咁易畀online取代。」

對飲食業零經驗的ViVi,並非「心口掛個勇字」便衝進去,她眼見當年精品飲食盛行,且「韓流襲港」,先到甜品舖兼職,收集市場情報及經營竅門,再專程飛赴南韓學製作甜品,其後引進當地甜品品牌Nun,在旺角開設「雪冰韓式甜品店」,主打雪奶(把牛奶冷凍成冰再刨碎)產品。

港人一向貪新鮮,由於雪冰是本地首間引入雪奶甜品的店舖,開業後平地一聲雷,吸引大批年輕人及KOL幫襯,「都要多謝好多飲食雜誌同artists(藝人)捧場」,高峰期甜品店於旺角、尖沙咀、銅鑼灣、澳門及深圳等皆有分店,風頭一時無兩,「嗰陣旺角(分店)每日直情排到街尾轉晒彎,試過有成200人排隊。」

試攻飲食業 貪勝不知輸

然而飲食熱潮來去匆匆,就如歌手鄭融名曲《紅綠燈》:「明明綠燈轉眼變成紅燈」,ViVi直言當年被勝利沖昏頭腦,結果貪勝不知輸,一子錯、滿盤皆落索,「因為貪心,2015年走去開銅鑼灣(分店),一簽3年約,損失慘重,最後趁品牌仲有少少價值,成盤生意賣晒畀人,攞返少少錢喺手。」

生意如人生,「哪管一次做錯,也都可摧毀這生」,她憶述,當年承租的舖位在銅鑼灣勿地臣街,租金之高不難想像,「簡直人間煉獄,嗰間舖足足輸咗我600萬,仲爭落人好多錢」,最惡劣之時甚至要透支信用卡、典當嫁妝還債,「到完約嗰日還原(舖位)交吉,一殼眼淚。」

惟長嗟短嘆也無補於事,未幾ViVi收拾心情,回歸老本行時裝業重新出發,由50元平價小店做起,「始終7年無掂過衫,脫節咗,雖然可以好快pick up(重拾)返,都要時間去摸索市場趨勢;(50元店)係有生意,但得個做字,完全無錢賺,諗諗吓都係賣返時尚啲、價錢高啲嘅衫,成績又唔錯。」

時為2017年,網上營銷已相當成熟,ViVi丈夫建議她嘗試在社交平台做銷售,她初時很抗拒,因本身既不懂電腦,亦對早年時裝店被網購「擊潰」的不快經歷難以忘懷,「好恐懼,做開咁多年實體生意現金交收,會覺得電話、上網(交易)好虛無縹緲、不切實際,同埋擔心自己年紀大,而家先開始(網上營銷)太遲,人哋都做咗十幾年啦!」

公司月賺百萬 倉庫萬呎

就在丈夫「遲做好過唔做」、「做唔到咪算,又唔使好多錢」等說話鼓勵下,ViVi鼓起勇氣克服心理障礙,親身上陣充當模特兒,示範各款時尚衣飾;捱過生意淡薄的首半年,不消一年,網購生意已超越實體店,遂正式成立Mixx Collection,產品亦愈趨多元化,由時尚服飾、美容健體以至食品都有,如今Mixx Collection已發展成倉庫面積萬呎、月賺逾100萬元的人氣電商,她亦由創業之路踏上直播大道。

ViVi笑言創業路上屢敗屢戰,靠的是打不死的「小強」精神,「咁講好似好老套,但真嘅,要好有毅力,好似不倒翁咁瞓低又彈返起身,同自己講『我好想做』;有啲人(創業)衰一次會驚咗,尤其嗰啲欠過人哋錢,或者面對過無錢出糧同交租,未必再有勇氣試多次,所以信念好緊要,不過,即使咁基本嘅嘢(堅持信念),未必人人做得到。」

採訪、撰文:許鎮邦

攝影:黃俊耀、受訪者提供

放大圖片 / 顯示原圖

放大圖片 / 顯示原圖

放大圖片 / 顯示原圖

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads