《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2022年8月8日
談吐斯文的余詠詩，中小學均就讀於出名運動卓越的女拔萃，加上本身來自體育世家，父親余潤興是香港乒乓總會會長、南華會董事會會長，一直熱心推動本地運動發展。在家庭與學校培育下，她從小已是體育健將，「細個鍾意打網球，至於乒乓波我其實未學過，不過都打得到，當然未去到比賽級數，羽毛球就入過校隊。」
教導女兒對自己有要求
Winnie笑言，父親雖鼓勵子女運動，目的只為強身健體，從不會催谷接受訓練，可能大家都有天份，「成家人運動都幾好，唔會打得好肉酸，（擊球）算有勁（度）嗰啲。」被問到近年以什麼為主？「主要睇有冇伴（笑），總之有得揮拍嘅活動，我都鍾意。高爾夫球對我嚟講（節奏）就慢咗啲，但個環境好靚。」
有道是球場為英雄地，惟Winnie直言不愛比賽，「我喜歡『搓波』，冇咁多顧忌，唔使大力抽或者攞位，一個唔覺意就落網，我享受一板板你來我往，本身並非好勝嘅人，只要reach（達到）我想要嘅嘢就得，唔需要同人比賽。做乜都係，最緊要過到自己要求就好開心，可能我要求已經高過人哋，咁仲使乜同人比賽？（可自覺是完美主義者？）盡量啦！永遠無話perfect（完美）嘅，有啲嘢始終有規限。」
這種「不與人比較，只做好自己」的人生觀，也套用到教導兩名女兒身上，長女跟隨母親步伐，目前在美國任建築師，幼女則遺傳母親對美學的熱愛，在大學讀藝術，明年畢業。不過，兩女兒所選全非Winnie要求，而是自由發展，「我只會叫佢哋千祈唔好同人比賽，好辛苦，但自我要求唔可以低，求其交貨就唔得，你做啲嘢出嚟梗係想畀人睇，咁當然要出得場面見得人。」
惟Winnie慨嘆，今時今日小朋友的學業壓力，較她的年代嚴重得多，「競爭太大，好多時問題係出自家長，如果唔係佢哋問『某某幾多分，你幾多分』，小朋友唔會察覺（競爭），我哋個年代，父母唔會問你讀書幾多分，（他們連）學校都唔去，交畀學校就算。而家個氣氛係好緊張，所以我嗰陣都唔同啲女返佢哋學校，費事見到其他家長，講邊個幾多分、邊度補習好，咪搞！」
大讚父母「太好人」
談到父親余潤興，Winnie連說3次：「太好人，好好人，對乜嘢人都好，萬中無一，唔係做出嚟，佢哋（父母）真係咁，從來唔怪任何人，呢樣對我嘅影響反而係『唔可以好似佢哋咁』，哈哈，呢個世界有壞人嘛，有啲人係唔識感恩。所以人哋對我好，就算只係小小事，我都會多謝得好緊要。遇到唔好嘅人，我會show（表現）畀佢睇，知道佢係唔好嘅人，會保持距離。」
放大圖片 / 顯示原圖
訂戶登入
| 下一篇： | 「設計25載」展覽慶回歸 |
| 上一篇： | 跨界策展人余詠詩 藉設計說故事建築師走進室內 助大眾鑑賞頂尖家品 |
