私人銀行家吳寶儀勇闖大中華
捨退休悠閒生活應邀加盟瑞士盈豐

銀行是百業之母，瑞士盈豐銀行（EFG）私人銀行業務主管吳寶儀（Jessica），投身業界逾30載，涉獵不同範疇；愛作新嘗試的她去年底加盟EFG，瞄準大中華市場，「香港緊貼大灣區，點可以唔做（大中華）？如何善用一間瑞士銀行嘅優勢去服務大中華客戶？始終EFG係一間pure private bank（純私人銀行），會好專注做好呢份生意，無其他雜念。」

大學讀文科的Jessica，與銀行業結緣乃源於一次暑期工體驗，「嗰陣喺上商（上海商業銀行）旺角總行做credit card（信用卡）文員，覺得幾特別，樓下係分行，可以接觸唔同人、唔同類型行業，同埋啲經理好好，教我好多嘢，（職員）又好似好多優惠，哈哈，似乎係幾有趣嘅行業，於是一畢業就apply銀行（職位）。」

入行30載親歷結業併購

她的銀行家之路在浙江第一銀行（Chekiang First Bank）起步，當時該行是日本第一勸業銀行（Dai-Ichi Kangyo Bank）全資附屬機構，「無人知浙江第一係日本銀行，個個以為係大陸。」幾年之後，她轉職另一日資大和銀行（Daiwa Bank），「呢兩間（浙江第一及大和）而家都已經不再存在」。

大和銀行結業可追溯至1995年，一名駐美國高管因進行未經授權債券交易，令銀行損失約11億美元，由多間日本銀行組成的JCB信用卡株式會社，要求日資銀行撤出多個海外市場，包括香港。當時任職大和香港分行的Jessica，「有幸」見證這歷史時刻，「未試過開銀行，但就要幫手去閂一間，我當時被指派參與做succession（演替），點樣去liquidate（清算）、winding up（清盤）個business，睇到好多嘢；（氣氛可有愁雲慘霧？）咁又無喎，因為係行業性同監管當局要求，同埋日本嘅銀行好有責任感，唔係完全執咗，只係用較細規模office去服務（香港）手上客戶。」

難忘零售財管業務開先河

完成該項「歷史任務」後，Jessica加入第一太平銀行，2000年該行被東亞銀行（00023）收購，她「連人帶行」過檔，初時從事商業銀行業務，未幾上司認為客戶需求開始改變，財富管理前景樂觀，建議她轉型嘗試分行層面的相關工作，她自覺年紀輕，一試無妨。

「講緊係廿年前retail banking（零售銀行）嘅所謂wealth management（財富管理），就係賣吓保險、做吓啲currency-linked deposit deal（貨幣掛鈎存款交易），嗰啲已經當係理財，都開始有啲基金，不過未去到好popular（流行）。」隨着民間財富增加及市場演變，她涉足大眾富裕市場（mass affluent market），成立東亞顯卓理財中心（SupremeGold），專攻這類客戶。

大眾富裕市場發展理想，東亞有意乘勝追擊，進軍私人銀行業務，Jessica再被委以重任，轉職新開設的私銀部門，是東亞拓展相關業務的關鍵人物，2015年獲《國際私人銀行家》（Private Banker International）雜誌頒授「傑出青年私人銀行家（大中華區—北亞洲地區）」獎項，並自2017年起擔任東亞私人銀行業務主管。

做生意靠信任產品屬次要

多年來涉獵業界多個範疇，她認為萬變不離其宗：「原理其實差唔多，所有銀行（業務）都係講『信任』同『關係』，因應唔同客戶需要去提供產品，但產品本身次要一啲，當然private banking提供嘅服務，同retail banking差好遠，（前者）樣樣都係度身訂造，產品亦豐富好多，唔只淨係存錢、借錢，而係牽涉整個財富傳承、規劃、人生部署。」

在東亞一做21年，Jessica不諱言，至今仍對舊東家充滿感情，「否則都唔會做咁耐」，但在職場拚搏日久，「領會心中疲累」感覺油然而生，「唔同崗位都做過，到最後直情兼任埋wealth management總經理個位，睇埋私人銀行、產品部、信託部，覺得好似『都好圓滿吖』，不如休息吓。」

Jessica去年初離開東亞，本打算退休，「嗰段時間開心到不得了，諗返都好懷念，做運動、瑜伽、行山。」市場又怎會輕易放過這樣的人才，悠閒了幾個月後，EFG亞太區執行主席趙善銓力邀她出山幫手，「佢之前唔同時間都搵過我加入，每次我都覺未係適當時候。」

「直到嗰次佢話EFG PB（私人銀行業務）阿頭（前主管Richard Straus）要退休，好想我過嚟，睇下點將一間以瑞士為基地嘅銀行，可以做大啲大中華區市場；我聽落幾吸引，一來未做過，二來又發揮到我以往掌握嘅私人銀行經驗。」遂於去年底放棄退休生活，加盟接受新挑戰。

市場環境瞬息萬變，銀行界面對的挑戰層出不窮，正是「今日唔知聽日事」的氛圍，令Jessica樂在其中，「前中後台（崗位）我都做過，每日有好多唔同嘅嘢要處理，所以雖然係做緊同一份工，但你每日面對嘅人、客戶、環境、產品都不一樣，呢個先至係最大樂趣。」

採訪、撰文：許鎮邦　攝影：何澤、被訪者提供

放大圖片 / 顯示原圖

下一篇：	會客善用科技講求同聲同氣
上一篇：	VR配自製教材隨時虛擬戶外考察

文章：

私人銀行家吳寶儀 勇闖大中華捨退休悠閒生活 應邀加盟瑞士盈豐

私人銀行家吳寶儀勇闖大中華
捨退休悠閒生活應邀加盟瑞士盈豐