和豐鮑靝鋒長跑哲學妙喻投資
港家族辦公室先鋒傳承財富靠韌力

剛出爐的《財政預算案》提出，為單一家族辦公室所管理的合資格家族投資管理實體，給予稅務寬免，以支持本港家族辦公室發展。和豐家族辦公室投資總監鮑靝鋒（Stephen），是本地首批從事相關業務的先鋒，本身屬「慈善跑手」的他，至今完成超過10次渣打馬拉松全馬賽事（42.195公里）之餘，更曾成功挑戰長達170公里的超長途越野跑。Stephen日前接受本報專訪，以長跑妙喻投資。

香港出生的Stephen，早年在英國修讀精算及統計學，碩士畢業後，曾於當地一家旅遊保險公司庫務部，擔任固定收益分析職位，後轉職摩根大通銀行附屬資產管理部，做過逾4年投資組合分析，2001年決定回港發展，「一來屋企人喺香港，同埋當時覺得，亞洲發展機會大啲，好多外國人都學普通話，去內地工作。」

回來後，他先在德意志銀行任職微觀量化策略師，繼而加盟香港賽馬會庫務部，負責管理投資組合，雖然同屬投資角色，惟馬會畢竟與其他金融機構不同，「最大分別星期六要返工（笑），返半晝，另外（馬會）比較上有少少半官僚，都習慣嘅，仲有（管理層）想法傳統少少，有好重hierachy（等級制度），同外國公司有啲唔同。」

2010年，Stephen有位朋友受瑞士Veco Group聯合家族辦公室委託，在港成立和豐，開拓內地市場，力邀他並肩作戰。家族辦公室專為富人提供全方位財富管理及家族服務，他有感當中牽涉到不少法律、投資、稅務及家族管理等問題，正好將自己以往的知識和經驗學以致用，毅然答應加盟開荒，從此與這行業結下不解緣。

民企需求大化身公司「管家」

時光倒流到12年前，家族辦公室在亞洲仍屬新概念，市場認識不深，「當年亞洲真係無乜人知，你同佢哋講，大家都唔知乜嘢嚟，最初係難做嘅，尤其中資背景或者一啲規模較細銀行，直情未有專門團隊負責家族辦公室業務，其實喺外國已經好盛行，所以我哋開頭係經瑞士老牌銀行去搵客，因為瑞士有好多私人銀行，佢哋比較了解呢方面運作。」

家族信託基金是家族辦公室的主要業務範疇之一，Stephen憶述開業當初有內地人想成立這種基金，他們會先找律師，而和豐的創始團隊中，正好有不少在這領域經驗豐富的律師，「通常我哋會先從一個細嘅專業領域切入，例如幫客戶成立家族信託，過程中展現專業，信任就係咁樣一點一滴去累積。」

近年家族辦公室業務在內地迅速冒起，Stephen解釋，中國上世紀八十年代改革開放，現時很多早期的民營企業家，都已踏入退休年齡，面臨企業代際傳承關鍵時刻，造就對這方面服務的需求爆發，「譬如我（民營企業家）係做生意，做實業嘅，啲子女唔識做，咁點樣將盤生意傳承落去呢？家族辦公室就可以提供協助，例如搞上市、商業信託。」然而他承認中外文化畢竟有異，不能完全照辦煮碗搬外國一套做法，「外國人（思想）開放啲，（子女）唔願做（家族生意），咁咪賣咗間公司，買啲債券擺入個信託度，每個月畀幾萬蚊你（子女）使，諸如此類。內地（企業家）可能係一手一腳做咗個實業，所以會想keep住間公司，有份情意結想子女繼承。」他直言為贏取客戶信任，公司除提供財務服務，甚至要化身「管家」角色，「好多你無諗過嘅（服務），（客戶）都會搵我哋幫手」，諸如為子女物色國際學校升學、尋找就業機會，甚至覺得與生意拍檔意見不合，也會向家族辦公室尋求意見，冀讓對方知難而退離開公司。

最怕遇上「鴕鳥富二代」

家族傳承方面的奇難雜症，可以靠專業服務解決，惟最棘手是遇到一些選擇逃避的企業二代，往往無從入手，「直情唔覆訊息，聽都唔想聽，傾都唔同你傾，好多時因為佢哋（二代）有自己想法，但得唔到屋企人支持，覺得灰心，久而久之就鑽咗牛角尖，乜都唔想理，呢啲情況唯有同佢哋屋企人講返，否則件事無辦法推進。」現在公司業務已上軌道，先後拿過內地「年度家族辦公室服務卓越獎」及「最佳代際傳承財富管理機構」，團隊努力總算沒白費。身為長跑好手的Stephen謙稱，努力不保證有成果，還要靠天時地利人和配合，就像馬拉松一樣，「唔同於考試，溫晒書熟晒啲嘢，就好有可能攞高分。」

「馬拉松係就算你練咗幾個月，做晒要做嘅準備工夫，都未必一定完成到，第一要睇你落場當日嘅狀態，萬一有咩頭暈身㷫已經好難玩；第二係天氣，我試過有次（賽事）上到山頂，突然漫天風雪，前面有個跑手忽然temporary blindness（暫時失明），我同隊友即刻扶佢埋一邊休息，搵嘢遮住佢對眼。」Stephen憶述。

「所以唔係因為你努力就得，會有好多控制唔到嘅外在因素，dictate（支配）咗個結果，例如大自然極端天氣；投資亦如是，唔係話你做足功課就贏梗，市況唔到你控制，好多『黑天鵝』例如打仗、疫情。」惟他強調，無論投資或長跑，最重要還是認清目標，有規律、循序漸進向目標進發，即使過程中偶有失敗或不盡人意，只要不放棄，總有一天會成功。跑馬拉松並非鬥快，而是靠韌力，家族投資也如是，與其着眼一朝一夕，更重要是講求長線效益；路遙知馬力，日久不難見成績。

採訪、撰文：許鎮邦　攝影：黃俊耀、受訪者提供