熱門:

2020年12月28日

周一人物

李峻銘創業做代理 屢遇低潮不服輸
世紀21奇豐主席 演繹獅子山精神

八十年代打銀行工,稱得上「穩穩陣陣」,然而有人即使連年升職加薪,也願冒險「轉跑道」。世紀21奇豐物業顧問行主席李峻銘(Eric)正是成功例子:出身基層家庭,曾在銀行界打拚,九十年代轉戰地產代理,經歷多次事業難關都憑「不服輸」心態成功克服,正是典型獅子山下奮鬥故事。

Eric的童年經歷像極了粵語長片:4歲父親過身,與母及弟居於慈雲山木屋,名副其實「獅子山下人」;清貧的家境培養出其堅毅性格,「(後來)住徙置區,得張碌架床,阿媽瞓下格細佬瞓上格,我連床都無。」

差劣的環境並沒影響其學業,1985年理工經濟系畢業後,Eric獲中資新華銀行聘用,「嗰陣中銀未合併,中資(銀行)仲有13間,已計劃緊(九七回歸後)接手香港金融系統,我哋算係早期加入嘅本地大學生,啲經理、上司多數中學畢業,來自紅色資本學校;但我唔理咁多,最緊要有份工,新華最快請我,於是去囉。」

銀行工難出頭 毅然轉跑道

惟當年任職中資銀行,發展有局限,「上晝睇下股票,下晝見下客就收工,無人管你同捽你數,太hea。」性格進取的他,兩年後轉職美資花旗銀行(當時稱萬國寶通銀行),在零售銀行業務部做銷售,「即係搵生意,當時銀行最搵錢係咩業務?mortgage(按揭),所以接觸最多係代理、律師樓。」

表現出色的Eric,不足一年升為分行經理,當時做按揭之餘亦開始兼賣人壽保險,「好新(業務),叫銀行分行經理賣保險,簡直震撼業界,覺得要放下面子,無人願意。」Eric偏偏人棄我取,「後生仔唔理咁多,最重要係有佣嘛!嗰陣份人工萬幾蚊,每月佣金成4萬,仲高過老闆,好誇張。」

可是,數月後銀行改措施,嫌佣金支出高,叫停這種激勵制度,「計劃『圓滿結束』,我quota繼續交,仍然攞獎,不過獎品改為年底由美國大老闆嚟香港,頒贈紀念筆一支。」事件令他明白,表現再好都不過是大機構中一粒小螺絲,「畀我做多10年又10年又點,做到當時老闆嘅老闆王冬勝個位,已經好叻啦!一來自己未必有本事,二來始終想做有佣金嘅工,多勞多得。」

「嗰陣老闆猛問我點解要走,其他同事一年加一次人工,我9個月一次,加幅最高,去到24%公司上限,但始終唔係我最想要嘅,大機構又多辦公室政治,太太都知(份工)唔啱我,鼓勵我創業。」Eric細訴因由。

人棄我取入沙田 再攻居屋

有了打算,適逢他兩名銀行舊同事3年前已開設奇豐地產代理公司,專做荃灣區物業交易,Eric決定入股,1991年成立分公司,在沙田開闢戰線,主攻大圍金獅花園、沙田第一城與大涌橋路一帶屋苑;為何是沙田?「都係朋友建議,當年沙田仲算新城市,發展空間較大。」

雖然有個好開頭,但1994年面對轉行後首個衝擊,年內美國聯儲局驚人地先後加息7次,由3厘調升至6厘,「香港跟住加,個(樓)市沉咗大半年,兩個partner退股唔玩」,只剩不服輸的Eric孤軍作戰,要縮細規模,關閉荃灣業務,專攻沙田。

然而,市面上幾間大型地產代理採取「你縮佢谷」的地區擴張政策,「沙田(地舖)一間變10間,競爭激烈好多。」Eric嘗試使出兩招應變,先由寫字樓搬落地舖,提高公司知名度,又與剛登陸香港的「世紀21」集團合作,改名「世紀21奇豐物業」,打響招牌。

熬過難關,詎料更大挑戰尚在後頭;1997年亞洲金融風暴爆發,不少行家戰友紛紛「陣亡」,「走佬嘅走佬,返大陸做地產,差啲嘅甚至破產、燒炭。」為了逆境求存,Eric毅然改變策略,由二手樓轉攻一手,「當時係個好大轉變,無乜地產代理公司識做。」

Eric進一步解釋,那年頭每逢發展商推新盤,買家便排隊認購,「嗰陣跟代理商會一起向發展商要求減租,人哋話:『租就唔減喇,最多畀樓你哋賣,益你哋賺佣金。』」他首個獲配售的新盤,是1997年入伙的大圍恒峰花園,「唔識做,但都要試,去地盤學,我會形容係『開車門』年代,開到(買家)車門就有機會做成生意。」

惟一手樓銷售只能「吊命」,Eric心知非長遠之計,「始終唔係發揮緊代理強項」,加上二手樓市道久不見好轉,有段時間令他感到萬分沮喪,甚至開始懷疑人生,「最差係2000年,積蓄用晒,要碌卡出糧,有諗過係咪應該放棄。」

最終令他繼續作戰的,仍是那份不服輸信念,「就算100間地產有99間蝕錢,都仲有一間唔使蝕吖?我就要做嗰間。」有毅力,也要有辦法,他再次發揮人棄我取本色,進軍居屋小眾市場,由馬鞍山起步,「行家多數唔鍾意做,因佣金少、手續繁複,路又遠。」

有錢先上車 然後樓換樓

俗語有謂「窮則變,變則通」,「我哋講法係『用農村包圍城市』,鎖定一個地區,先做好周邊『農村』,慢慢向中間推進;如果你樣樣都做,唔會夠人打,人哋60人我得6個,所以做好居屋先,對手無咁多,到居屋(業務)成熟咗、養到人,就做上車盤。」這策略果然奏效,2003年起公司轉虧為盈,此後業務愈做愈大,近年更進軍大灣區及海外。

對於新一代常嘆買樓難,入行多年的Eric有其看法:「全球大城市都面對緊呢個問題,貧富懸殊當然唔好,都要適應,年輕時唯有節約啲,儲到第一嚿錢上車先,資產遊戲係咁,一路升值會輕鬆好多。」

他續稱:「千祈唔好諗第一間就買到dream house,可以買一間放租,另外租間自己想住嘅,起碼套戥咗先,之後再諗樓換樓。」他以自身經驗為例,早年任職銀行有超低息貸款,首次置業是大圍金輝花園,「仲要買炒家貨,貪佢有晒裝修傢俬。」

「嗰陣人工3600蚊,每月供樓連雜費3000,得返600蚊,咪做兼職囉!係要有犧牲。」未幾他成家立室,沽出金輝,購入北角另一大單位,持貨兩年後套現做生意,「如果當初無買樓,之後根本無機會做奇豐」,Eric分享自己經驗。

新冠肺炎重挫本港經濟,樓價雖有上落,暫時影響不大,個別甚至創新高,「揸磚頭」除較穩陣,遇上「手緊」可加按甚或賣樓;看來當年Eric「轉跑道」選擇正確。

採訪、撰文:許鎮邦

攝影:黃俊耀、部分照片由被訪者提供

放大圖片 / 顯示原圖

放大圖片 / 顯示原圖

放大圖片 / 顯示原圖

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads