企業動物求生術

在大企業工作，能力愈高，反應愈快，通常死得仲快。企業動物生存之道，不外乎四個字「閃、拖、擦、搶」。

老細發下來的工作，他們會第一時間「閃」，推說這並非自己範圍，手下沒人懂得處理，又或者有別的工作正在忙，沒時間兼顧，這時候，比較積極進取、責任心重又順得人的同事，就會主動接下這條「單」，讓那些「又懶又廢」同事成功「閃」開，繼續不做不錯，準時收工，儍同事則做到天昏地暗，搞不好，分分鐘還要捱罵。

企業動物另有一種特殊技能——「拖」，他們不到死線不會交功課，原因很簡單，效率高無着數；效率低，老細也不想給你太多工作，催你又唔係，鬧你又勞氣，不如找一些勤快同事，「嗱嗱聲」做完好過，於是，那些愛「拖」同事又得逞，繼續享受人生，手腳快儍同事做到兩眼發直，搞不好，還要做埋你嗰份。

做嘢又慢又卸膊，怎會贏得老細歡心？錯晒！他們的時間沒用來認真工作，卻是百分之百用心鑽研其餘兩招：「擦」和「搶」。

唔好以為擦鞋好容易，你要對老細觀察入微，知道他的個性、嗜好和品味，才能在適當時候做一些事、說一些話，投其所好，讓他覺得自己英明神武、領導有方，擦鞋功夫需時間細心經營，當然還要臉皮厚。

最後一招「搶」，境界至高，每日唔做嘢，卻懂得扮做嘢，然後適當時候阻住其他人做嘢，見到有成績、有業績，就第一時間搶在同事面前，向老細邀功。

於是，不停工作的儍同事頓悟世間險惡，忍無可忍辭職唔撈，留下的企業動物，繼續步步高升，你死佢都未死！

上一篇：

耍廢

文章：