第時退休

日捱夜捱，想退休唔使做，乃人之常情，經常聽到朋友話：「第時退休，我想點點點、會做乜乜乜……」每天返工都在倒數日子，夢想向退休生活進發。

朋友是公務員，退休享長俸，輕輕鬆鬆過日子，不用擔心耗盡積蓄。他的退休生活怎樣過呢？他說：通常睡到早上九點自然醒，然後食早餐，跟住煲劇（日劇、韓劇和內地劇都煲），下午去街巿買餸準備晚餐，晚餐後又看看電視，十點幾上床睡覺，咁就一日。有時會到康文署體育館打羽毛球或乒乓球，間中到郊野公園行行山，疫情過後終於可以去旅行，每兩三個月就飛一次，計劃行程已經夠他忙。

另一朋友是銀行高層，退休也生活無憂。可是，仔女都選擇移居外地，帶埋孫仔孫女走。他捨不得香港，惟有兩邊飛，每隔兩三個月，便要坐飛機去歐洲探孫兒，好不忙碌。我問他，享受現在的生活嗎？他說，坐飛機好辛苦，無辦法，錢都用來買機票。

還有一位朋友，退而不休，六十歲後想體驗不同生活，找職業中介公司安排做散工，由展覽會接待員、餐廳侍應、代課老師都做過，那部分的社會群體，都是他以前從未接觸過，他很享受退休後的另類生活體驗，既可賺取少許收入，又可擴闊生活圈子，還有機會與年輕人交流，確保自己唔會Out。

第時退休，做咩好？其實唔使諗。

因為退休後，你會發現，有時間但無體力；有錢，無人陪你使；有想法無記性；辛勤工作幾十年，擁有很多，時間卻無多。所以，有地方想去，要即刻去；有朋友想見，要快點見，因為今日唔知聽日事，千祈唔好留返退休先做。