如有天櫻花再開

今時今日，想睇櫻花，不一定要去日本，赤鱲角、將軍澳單車館、大埔海濱等景點，近日已經吸引大批民眾前往賞櫻，但利物浦的「櫻花季」又會何時再臨呢？2019年奪得歐聯，2020年首奪英超冠軍，紅軍上季包攬兩項本土盃賽錦標，殊不知今季會「淪落」到高不成、低不就，再看近憂遠慮，細思極恐。

作為對上5季唯一有力與曼城在本土拗手瓜的球隊，利物浦今季被多隊打得落花流水，踏入下半季仍徘徊中游位置，上場默西塞德打吡有驚無險以2比0擊敗愛華頓，才打開2023年聯賽勝利之門，令人不勝唏噓。「終於有啲似樣，似番少少以前嘅利物浦。」紅軍領隊高普（Klopp）難得展露歡顏，惟暗示難關尚未過去，「坦白說，我之所以亢奮慶祝勝利，全因不知道下次何時會來。」

紅軍現時仍排名第9，落後歐聯區9分，意味着周六英超尾場作客第4的紐卡素，不成功、便成仁。「只要粉絲想我做，我都樂意去做，除衫例外，哈哈！」高普承認傷情終見起色，迪亞高祖達（Jota）、華基爾雲迪積克（van Dijk）、羅拔圖法明奴（Firmino）上場有份列席後備，但伊巴希馬干拿迪、堤亞高艾簡達拿和路爾斯戴亞斯依然未能歸隊。

相對同是天涯淪落人的Big 6褪色豪門車路士，紅軍的危機大得多，一來美國老闆約翰亨利有意放盤，志不在此，偏偏碰上死敵曼聯也在待價而沽，導致卡塔爾、沙地阿拉伯等資金一窩蜂湧去奧脫福「湊熱鬧」；二來管理層經歷人事變動後，收購眼光令人搖頭嘆息，年輕化的速度遠遜預期；三來，球隊一旦缺席下季歐洲賽，今夏想增挖角猛將如祖迪比寧咸（Bellingham）等，恐怕更妙想天開，牽一髮而動全身。

對賽格食格

「紐卡素今季大躍進，保持11場不敗，今番是球隊的期中考，但願我們能延續上場勇猛演出。」紅軍17年來首次面對喜鵲時排名較對手低5位以上，中場佐敦軒達臣（Henderson）賽前落力打氣。球隊若能在這場「六分波」勝出，便可把分差縮減至6分，但輸了就會被拉開到12分，茲事體大，而且下周中歐聯十六強首回合將惡鬥衞冕的皇家馬德里，也是後顧之憂。

另一邊廂，紐卡素今季抱住「贏唔到你，亦唔輸畀你」理念作戰，難以擊倒，迄今聯賽只逢一敗，剛巧正正是季初負於紅軍腳下。事實是回望對賽往績，喜鵲慘不忍睹，對上12場交鋒未嘗一勝，近5次主場應戰也無力報捷，似被「格食格」。雪上加霜是祖爾韋洛克倦勤，中場核心般奴古馬雷斯坐波監，可幸攻擊手辛特麥斯明和哥林威爾遜只屬微傷，問題不大。