2022年8月17日
辦公室消息人士近日放風,傳出近年升職最快的人妻,因不滿老公只顧炒股票和虛擬貨幣,導致夫妻關係出現裂痕,繼而戀上了同一部門的靚仔同事,美好家庭隨時毀於一旦。這件事不期然令我想起多年前,契家姐與契姐夫的真實故事。
初中開始,我經常去小娟的屋企玩,她有個相差5年的家姐,待我如妹,忘了何時開始,經常以「契家姐」稱呼她。契家姐性格孝順、知慳識儉,中七畢業便投身社會,做過不同類型的基層工作,直至為一名紅酒商人打工而富起來。
「800呎有啲細,我哋想住闊落少少。」大約九年前,契家姐懷第二胎時已經在何文田四出睇樓,目標價是800萬至1000萬元的單位。
「太好了,入伙禮物都已經準備好。」我真心欣賞她的賺錢能力。
一年眨眼過去,契家姐上「車」的喜訊依然沒有下文,出於好奇,我向小娟打聽一下。「姐夫炒燶股票,睇嚟都凍過水。」她欲言又止地說。
幾個月後的一次節日聚會,契家姐飲多兩杯,悄悄告訴我:「老公輸了800萬,別告訴小娟,連我阿媽都唔知。」
「咁你哋有咩打算?」
「唔緊要啦,反正我哋一直有輪公屋,又屬於『擠迫戶』,應該好快上到樓。」不知道她花了多少時間消化整件事,還是她天生極度樂觀,表情竟然沒有一絲憂傷。
小娟說他們兩公婆感情出現過裂痕,但為了一對子女也甘願走下去,最重要是契姐夫浪子回頭,由以前的文職轉為搞裝修,踏踏實實地重新做人。
如是者,九年飛逝,長子升上中學,次女亦就讀新界名校,兩公婆今日雖仍住公屋,但恩愛如昔,幸福美滿。究竟一段婚姻、一段感情值幾多錢?真的無法衡量。一家人經歷了什麼,外人永遠看不穿。
訂戶登入
下一篇: | 發明與發現 |
上一篇: | 病裏乾坤唐君毅(下) |