而家冇翅你食啊？

達聞西最討厭啲着數攞到盡，郁下就喊苦喊忽嘅人。學《旺角卡門》個烏蠅哥話齋：「而家冇翅你食？冇鮑魚你食啊？係冇冷氣啫嘛！」講緊邊個？咪係喺傳媒面前喊到爆水喉咁嘅阿拿奧杜域囉！奧地利伊巴？奧地利喊包就有你份！

呢位中超上海海港隊中鋒，日薪35.6萬人仔，原來係喊因疫情關係，唔見妻兒成幾個月，呢次回國備戰歐國盃，一時悲從中來，忍唔住喺傳媒面前「淚崩」。「太唔容易啦！同家人分開幾個月，返到奧地利開心晒！嗚嗚嗚嗚……」

喊完未啊？喊完聽達聞西講。海港隊攞住把槍叫你返去啊？廣州隊嘅巴西國腳保連奴就拒絕歸隊，選擇留喺家鄉陪家人，目前仲傾緊解約添！海港隊嘅巴西球星侯克點樣呢？同女友喺上海灘踩單車，不知幾浪漫，幾樂不思蜀！

條路自己揀，責任自己孭。呢個奧地利喊包係「躺平族」祖師，唔係點會唔踢英超打中超啊？去到中超又懶操hea踢，自爆日日飲汽水，玩到天光先瞓。最近接受奧地利電視台訪問，再次自爆喺中國有個花名叫「Da Bao Bao」！

躺平大寶寶

唔係大包包，係大寶寶（大BB）！係咪聽到都起雞皮呢？「喺中國好慘啊！冇得關注奧地利隊比賽，因為睇直播要到凌晨時分！」試問邊個亞洲人唔係夜媽媽睇波啊？因為亞洲同歐洲有時差啊，阿拿奧杜域BB！

講真，疫情底下球星已經好幸福啦！而且中國外交部同國家移民管理局，舊年9月就允許外國人入境，包括家庭團聚呢類。「大寶寶」點解又唔接老婆仔女去中國啊？如果海港隊喺山旮旯城市都算，上海係國際大都會啊！

中國網民都反感：「這個球員太不專業，吃最好的用最好的，錢也賺不少，有什麼可哭的？在外面背井離鄉多的是啦！我只能說這個人像個娘們，甚至還不如娘們兒！」呢位網民講得太到肉！

達聞西覺得海港隊要同奧地利喊包照下肺，兼做下國情教育，我哋偉大祖國防疫做得咁好，人民生活悠閒，鮑參翅肚樣樣齊，有咩虧待過你啊？返到家鄉唔講下過得幾幸福，竟然走去做大喊十？實在太冇職業道德啦！

下一篇：	周日主要足球賽果及主要足球賽程
上一篇：	歐國盃列強簡介

文章：