熱門:

2021年5月26日

達聞西 競技研究院

使唔使咁絕啊!

狂牛兵團教練安歷基使唔使咁絕啊?點將24人出戰今夏歐國盃,居然一個皇馬球員都睇唔上眼?話晒都係今季西甲聯亞軍球隊,唔會差成咁啩!最離譜係狂牛隊長沙治奧拉莫斯都冇面畀,可以講係皇馬史上最黑暗嘅一日啦!

一啲都冇誇張啊!狂牛參加歷屆世界盃同歐國盃,從來未試過冇皇馬球員嘅,衰極嗰屆係1950年世界盃都有莫路尼一位皇馬球員啦!何況,呢班西班牙球員有冇咁高質呢?沙治奧拉莫斯好歹都係沙場老將,大賽經驗夠晒豐富。

皇馬3年前俄羅斯世界盃有7名球員入選,包括艾斯高、馬高阿辛斯奧、盧卡斯華斯基斯、丹尼爾卡華積、拿祖費南迪斯、奧迪奧蘇拿,呢個夏天通通可以係屋企睇直播啦!好彩教練安歷基都係皇馬名宿,唔係皇馬球迷一定吵到拆天都似。

佩雷斯嘅錯

呢個怪象其實係必然嘅,亦係皇馬會長佩雷斯嘅失敗,佢一項奉行「球星加青訓」政策,結果呢幾年球星買唔到,就連本土青訓都青黃不接,真係要好好檢討下啦!唔單止年輕人眼光要放遠啲,擁有話語權嘅人士,都要學下用望遠鏡呀!

以波論波,皇馬陣容真係跟唔上時代步伐,呢次直接導致拉莫斯被叮走嘅,就係最近入籍代表西班牙嘅拿樸迪,呢位曼城中堅位置嘅中流砥柱,近年喺英超同歐聯嘅表現非常穩定,達聞西都唔明點解迪甘斯唔選佢入法國隊。

拉莫斯34歲,拿樸迪27歲,畀你識得點揀啦!何況拉莫斯今季傷多過踢,更加係季尾先嚟傷,狀態都未恢復十足,安歷基又點肯冒險呢?呢位教頭宣布前打過電話畀拉莫斯,解釋自己點解冇選到佢,做到好嚟好去啦!

拉莫斯都喺社交網站講感受,坦言只好無奈接受現實,「呢幾個月衰到貼地,結果連歐國盃都要踩多一腳!失望啊!不過,人生點會成日都盡如人意呢?咁咪趁呢個假期好好休息囉!不過,我依然會為狂牛兵團打氣嘅!」

呢位老牌中堅都好多唔得閒,除咗要操起個狀態外,都要煩呢個夏天轉會嘅嘢;皇馬後防希望來個大換血,之前傳過巴黎聖日耳門想挖佢走,但係最近好似有靜咗落嚟,日前仲傳可能重返母會西維爾添!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads