Dream, Dream, Dream

MIRROR之後有ERROR，ViuTV呢期想唔紅都難；MIRROR賣點係姜B，ERROR賣夢想，外貌同身形都係演藝界非主流嘅後生仔，只要公司肯捧、自己肯努力，一樣可以做明星！呢個就係香港人Buy佢哋嘅原因！193高得滯？隊長梁業肥過頭？學萬梓良吊住條鼻涕怒吼：So What！

算啦！對啲頭腦守舊、得把口講「社會責任」嘅過氣八卦精，點講都係唔會明，不過，唔係上咗年紀嘅都係鹹魚，43歲嘅祖雲達斯門將保方，周三幫助球隊奪得意大利盃冠軍，賽後話如果有班主好似自己咁癲，好願意下季繼續踢落去。

保方思想有幾癲？「我從來唔畀自己設界限，呢世仔都挑戰自己極限。我絕對可以開開心心收山，不過我覺得仲可以繼續。我等緊一個瘋狂老細，為我嘅人生提供瘋狂火花，繼續燃燒落去！」可惜啊，ViuTV冇足球隊！

講起瘋狂老細，歐洲傳媒最近瘋傳中甲球隊淄博蹴鞠隊嘅趣聞，話老細何世華派自己個200斤重嘅仔落場，一時間《馬卡報》、《太陽報》等歐洲報紙都轉載。其實，呢單新聞半流半真，啱唔晒，不過都錯唔晒。

內地傳媒笑歐洲傳媒呃like冇腦，個大肚腩肥仔落場係舊聞，佢真身係中乙吉林百嘉嘅班主徐廣楠，唔係何世華嚟！之不過，「肥楠」又好、「肥華」又好，都已經證明中國聯賽幾騎呢！班主都可以落埋場？呢啲叫咩職業足球啊？

專業地發夢

八十後嘅徐廣楠背後有段古，原來佢細個夢想踢職業波，點知太過肥冇得圓夢，等自己發咗達就買咗支球隊，仲註冊埋球員身份，點都要搵機會一圓球員夢。呢件事幾勵志下，不過係態度有問題。

人家ERROR保持真我，但又認真排練、努力去做，呢個徐廣楠、何世華落到場行行企企，好唔尊重對手同個聯賽！同樣道理，球員或企業唔一定講資歷或名氣，但你一定要認真、專業去做，咁先至可以贏得民心。

達聞西係電視撈飯嘅一代，自從睇到皇帝話：「同朕再check下！」從此開飯唔敢開電視啦！點解？唔想笑到噴飯吖嘛！最近聽講有人想搞明星運動會去谷奧運熱潮，上個禮拜達聞西先話一定出明星足球隊，開口又中，問你怕未？

下一篇：	戴亞斯膺足球先生
上一篇：	長者伸展運動好處多

文章：