熱門:

2021年4月27日

達聞西 競技研究院

踢走格拉沙

紅魔鬼球迷呢排好熱血,上街放晒煙花,又出動小型飛機扯橫額,訴求依然係:格拉沙滾蛋!自2005年美帝家族入主奧脫福後,當地球迷嘅抗爭都未停過,可惜一路冇咩進展,太陽依舊升起……

到底有幾多球迷杯葛呢?球場看台近年反而多咗唔同種族嘅球迷,香港曼聯迷又有咩感受呢?咪又係照樣喪嗌B費、綠木、福仔、連美斯……所以,唔好再呃自己話「冇球迷冇足球」,有波打就有球迷。

達聞西都替死忠曼聯迷唔抵!當年格拉沙以空手套白狼形式入主,將大部分貸款轉嫁落球會,變相由曼聯同球迷找數,跟住仔仔女女入晒董事局,無所事事人工照𢭃,每年伸手問球會攞千萬鎊。

所以話識人好過識字?計我話識玩財技先緊要!遇到呢類商場高手,紅魔球迷只可以鬥命長。近日傳出格拉沙家族想以40億鎊放盤,仲話歐超聯風波後不堪球迷抗議,格拉沙家族面皮咁薄就好咯!

40億鎊係咩概念?格拉沙當年大約8億鎊入主,你話係咪天價呢?曼聯呢10幾年咩成績同表現?到底有邊個肯買呢?達聞西醒起沙地阿拉伯王儲穆罕默德,之前真係傳過想以40億鎊收購紅魔鬼。

不過球迷們唔好開心住,呢個穆罕默德名聲好臭,舊年8月以3.4億鎊收購紐卡素,結果全國各界大力反對,搞到英超聯審查都過唔到。有錢都唔買得,可見呢位阿拉伯王子有幾咁唔掂!

沙地王儲名聲臭

格拉沙家族唔要得,阿拉伯王室唔賣得,咁夢劇院——奧脫福幾時先重見天日啊?咁世事往往難以預料嘅,邊個又估到一場疫情,令全世界停頓落嚟呢?正正今日唔知聽日事,咁先至希望在明天嘛!

曼聯名宿簡東拿最近接受訪問,話好恨當年踢個水晶宮球迷踢得唔夠狠!當日呢位水晶宮球迷種族歧視簡東拿結果慘食大帝飛腿,「我日日被人辱罵,嗰日突然起腳還擊,可能喺另一個時空發生,我可能一笑置之。」係咯!亂世之下,難免感到憤怒,但都要保持冷靜。好似曼聯咁,一代代班主、領隊、球員轉來轉去,球會同球場卻永遠都喺番度。

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads