2021年4月19日
疫情玩變種,世界立立亂,有咩緊要得過條命仔呀?羅馬中堅基斯史摩寧上周五嚇餐懵,睡夢中驚醒擘大眼就見到槍眼嘞,惟有乖乖照住3名持械賊人指示,打開夾萬交出名錶、珠寶,先保住自己、太太Sam同兩歲仔Leo條命。
本身係模特兒嘅Sam,事後喺網上大發雌威痛斥賊人係「鼠輩」:「凌晨4點攞把槍指住人哋個頭,似番個男人啦!我知道你哋搵食艱難,但總有其他出路啊?做埋啲咁嘅陰騭嘢,一定會有報應㗎!只係時辰未到咋。」
半夜劏死牛
Sam仲借機向賊佬申報「家產」,費事班鼠輩又上門搵食。「嗱!你哋聽清楚,唔好再來我屋企啦!所有珠寶已經搶走晒,我亦冇打算入番啲新貨。如果大家見到我有戴珠寶嘅話,通通都係朱義盛嚟,搵食唔該行遠啲。」Sam寫道。
呢次最新意甲入屋打劫事件,史摩寧全家損失10萬英鎊,算破財擋災係啦!之前,費倫天拿嘅列貝利、祖雲達斯嘅韋斯頓麥堅尼都中過招,只不過案發時佢哋打緊比賽,冇同賊人面對面周旋,唔使飽食驚風散啫!
史摩寧上季以借將身份由曼聯加盟,今季正式轉會効力到2023年,佢喺郊區買間有700年歷史嘅大屋,遠離羅馬市中心25英里,想話喺鄉下地方過平靜日子!勢估唔到偏僻得滯都有煩惱,成為賊人犯案嘅目標。
根據警方披露,膝傷休養緊嘅史摩寧當晚睇完歐霸盃羅馬主場對阿積士,夜麻麻開車番郊區嘅屋企,唔排除賊人開車釣住佢尾,一路跟到去老宅附近守住,等到佢全家瞓到扯鼻鼾嗰陣,先至偷偷爬牆入去做世界。
意大利警方睇緊附近CCTV片段,希望搵到一啲蛛絲馬跡。不過,史摩寧一家人亦都唔夠小心,明知意甲球星屢屢變成人肉提款機,點解冇提升家居嘅保安級別呢?起碼都養番幾隻藏獒、請幾位私人保鑣看門口啦!
最後,達聞西想提醒下Sam姐,雖然呢單嘢聽見都嬲,但出帖鬧賊佬好似唔係幾好。你在明時人家在暗,蝕底嘅永遠係良好市民!忍一時風平浪靜,再黑暗嘅日子都會過去,只不過冬天長少少咁解啫!
放大圖片 / 顯示原圖
訂戶登入
下一篇: | 周六主要足球賽果及主要足球賽程 |
上一篇: | 降班 |