熱門:

2021年4月13日

達聞西 競技研究院

真係估你唔到!

老貓都有燒鬚時,睇波梗有跌眼鏡!達聞西之前用「連美斯」呢個花名笑連格,認定呢位28歲嘅紅魔球員已玩完,去韋斯咸係迎接職業生涯嘅黃昏階段,點估到佢愈踢愈好,仲領軍上埋第四位添!

呢次眼鏡跌得認真碎!呢個連格前個禮拜對狼隊,已經試過爆足半場單騎入波,再嚟個5名對手夾擊下突圍助攻!簡直有「美斯踢波似連格」之感!上場3比2擊敗聯賽三哥李斯特城,再整個禁區頂凌空抽射金球。

連比利先生!使唔使咁大力摑達聞西一巴啊?叫曼聯領隊蘇斯克查情何以堪呢?披上棗紅色戰衣,左右手各握鐵槌,9場聯賽全部正選,fight到6勝2和1負,唯一係輸畀曼城,貢獻8球同4次助攻!

呢粒紅魔巨鑽再現光芒,唔單止之前英格蘭國家隊領隊修夫基重召佢,本土勁旅都雙眼發晒光,倫敦豪門阿仙奴今夏想挖角,韋斯咸就想求佢繼續留効,連格一時間又變咗搶手貨。

轉會現光芒

21世紀係創新嘅年代,連格接近3張嘢經已算老嘢,居然可以枯木回春,真係值得達聞西同TVB學習啦!聽講周日晚TVB有新節目《開心大綜藝》,聽講黃絲們嫌老土,藍絲們嫌惡俗。

達聞西點睇?答案係冇睇!周日頭場韋斯咸大戰李城,中場熱刺惡鬥曼聯,尾場阿仙奴3蛋贈錫菲聯!從扒住飯睇頭場,3場波各有兩個廁所「break」,分別用嚟沖涼同煮宵夜!忙到死,點記得捧曾志偉場?

TVB節目收視一瀉千里,一方面冇競爭冇進步,另一方面係替代品太多啦!以前日頭做到隻積,夜晚番屋企睇電視休息番一陣。當年英國波一個禮拜直播一場,已經要買定花生、薯片同錄影帶,錄低等平日再重溫!而家又YouTube、又Netflix,英超……連俄超都有直播,邊個得閒睇王祖藍又扮女人啊?講真,曾志偉同王祖藍頭炮射咗落海,因為呢啲橋網民一早估到!創意同驚喜係失敗中嘅失敗。

不過,達聞西睇到連格呢個case,唔敢講TVB一定會亞視化,畢竟曾志偉係典型香港醒目仔,曉變通兼唔輸得,或者、可能、有機會度出一條新血路呢!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads