《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2021年3月22日
中國足協主席陳戍源上台約1年半，動作多多、雷厲風行，咩限薪、隊名中性化等，搞到中超、中甲啲班主無鞋挽屐走，連中超冠軍江蘇蘇寧都退出球壇！都咪話唔得人驚，呢位陳舵主日前接受央視主持人白岩松訪問，坊間直指好似個節目名《白問》咁，問咗都等於白問，簡直係風扇底傾偈——講風涼說話！
陳舵主係上港集團前董事長，2013年成立上海上港，短短6年變成超級豪門，仲親手引入巴西超級球星奧斯卡同侯克，根本係中超金元足球嘅搞手之一！當年中超提出限薪陳舵主係咩立場呢？如今做咗足協會長就話足球係「社會公益產品」！唔怪得周六晚訪問一出街，引來好多足球記者反駁！
達聞西兩年前都睇好陳戍源，起碼佢係球會班主出身，唔似得前主席蔡振華係打乒乓波嘅！斷估政策唔會咁九唔搭八啩！點不知就一山還有一山低，有興趣同熱誠搞波嘅生意人通通嚇走晒。佢嘅講法好理想，話呢類投資係足球泡沫，撇去呢層泡泡同油膏，長遠嚟講對足球發展係有益嘅！
惹火陳舵主
不過大家不滿陳舵主大細超，對廣州恒大等隊名要求嚴格，逼到要改名做廣州隊，但係對親生仔上海上港，就話改為上海海港就收貨！白岩松質疑佢喺背後發功，陳舵主就話離開上港隊兩年，自己都唔鍾意呢個新名，純粹係上港集團決定！佢又話北京國安好大機會唔使改名，咁對其他球隊咪好唔公平？
不過，有一點陳舵主講得冇錯，就係如果唔限制薪水，中國足球兩年內就會崩潰，因為根本冇企業撐得住！仲話即使限薪球員收入都高過日韓球員。達聞西一早就話中國足球泡沫嚴重，所謂豪門都係死充大頭鬼，好似中超5年轉播版權吹到80億人仔，陳舵主就透露一半都收唔返，如今個價亦唔再係80億啦！
陳舵主最惹火一句係話，做咗46年企業老闆從來只有佢鬧人，做咗足協主席就日日畀人鬧，講到好慘慘豬咁！喂，你私人企業衰咗自己執笠，關記者、市民咩事？但足協主席亂嚟就係中國足球埋單，又點同呢？佢仲話自己後悔過，但最後都堅持做落去，係因為有「追求社會責任」嘅心！有心係好嘅，之不過有心有時會做壞事呢？香港人見太多呢類領袖啦！
放大圖片 / 顯示原圖
訂戶登入
