細哨加油！

巴西名宿「細哨」朗拿甸奴球技過人，可惜私生活不檢點，搞到好快就走下坡。近年更加係厄運連連，舊年喺巴拉圭因使用假護照坐冤枉監，返巴西仲確診埋新冠肺炎，2月到阿媽當娜染疫離世。

最近細哨友人向巴西報章《Extra》爆料，話佢自從阿媽過身後，同班酒肉朋友夜夜笙歌、日日開P，由朝飲到晚咁小兒科？「係由朝頭早，一路飲到第日朝早！威士忌、伏特加……總之就成屋空樽啦！」友人話。

朝早飲到第朝

達聞西開頭都覺得冇咩，佢唔飲酒去飲茶，先至叫做新聞啦！不過，呢位匿名者話：「佢係一路蒲慣，但最近情況有啲失控，班朋友唔係飲酒咁簡單，仲有好多行為會傷害到細哨啊！」呢位酒友講啲唔講啲。

據講，細哨喺家鄉阿雷格里港嘅豪宅，守衞森嚴、圍牆高築，請各地好友到來盡慶！日本魚生、巴西燒烤、法國紅酒應有盡有，當然唔少得美女助興。唔使問阿貴都知肯定違反限聚令啦！不過，當地警察就隻眼開隻眼閉。

達聞西知道阿媽係細哨嘅精神支柱，以前成日話阿媽去到邊，都帶畀周圍嘅人歡樂同力量。呢位大孝子如今痛失愛母，一時難以接受以至借酒消愁，其實都係人之常情！但係凡事都要有個節制，希望細哨盡快告別傷痛啦！

其實，呢位名宿唔同朗拿度、阿祖安奴等森巴名宿，除咗踢波叻之外，仲有rap歌等音樂才華。上個月仲同Krawk、Kant等當地rapper合作，錄咗首Black Magic嘅歌曲，又推出個人香檳品牌，諗頭認真多！

可惜啊！啱啱走出冤獄同肺炎嘅煎熬，就遇上人生最大打擊，呢一關真係要靠佢同家人共同渡過，至於身邊啲酒肉朋友又好、義氣兄弟亦好，除咗陪玩陪飲之外，都要適可而止，唔好飲壞細哨嘅身體啊！

唔好話巴西球星，好多球員退役最大挑戰，就係點樣面對餘下人生，好多人亂使錢，最終落得流落街頭。阿根廷球王馬勒當拿又如何呢？咪又係死得不明不白？數以千萬計財產都不知所終。

細哨情況好啲嘅，起碼經理人係自己阿哥，點都唔會穿櫃桶底！不過，下次出國去其他國家，記住唔好用其他人提供嘅護照啦！

下一篇：	滑鐵盧
上一篇：	一將功成萬骨枯

文章：