熱門:

2021年3月18日

達聞西 競技研究院

No money no talk!

2020年冇口罩就心慌慌,真係貴一貴都要焗住買,2021年最驚又係冇咩呢?就係晶片同money啦!達聞西唔曉high-tech嘢,唔使好似任正非咁周圍巡豬場同煤礦場,諗下點將華為科技上山下鄉去山旮旯地方。

講到缺錢嘞喎,邊個會嫌錢多呢?阿Sam許冠傑70年代已經唱緊「錢錢錢錢……」今時今日中美兩個超級大國,最叻咪又係印銀紙囉!中超喺經濟不景氣同新冠肺炎影響下,亦去到一蚊賣球會都冇人要嘅地步,講到尾又係錢作怪。

達聞西唔鍾意齋踩唔畀建議,中國足協大可以參考下西甲嘅例子。話說上世紀80年代尾西甲會欠纍纍,西政府1992年就推出體育法(Sports Law),逼球會放棄會員制容許商人入主,剩返巴塞、皇馬、畢爾包、奧沙辛拿4隊繼續會員制。

會員制球隊係非牟利體育組織,可享有較低票價、較低稅率,如果有籃球等其他體育隊,仲有額外補貼添!呢類球會由董事會管理,每屆由會員投票選出話事人,會長要擺低一季營運成本嘅15%保證金,先可以將球會舞龍咁舞。

中超參考會員制?

內地企業近年苦過弟弟,老細個個打腫塊面,其實係超級老賴。既然係咁樣樣,何不試行西甲模式?之不過係反其道而行,由私人持有變成會員共有,即係「中國特色」嘅會員制啦!球迷可以畀錢做會員,但董事局由市政府把持!

咁好怪?一啲都唔怪!好似巴塞10幾萬會員,你估個個有資格入閘啊?最近贏大選嘅拉樸達,周二先籌夠1.2億歐羅保證金,順利坐上會長寶座。既然中超球隊債務咁嚴重,唯一辦法係政府孭起條數,然後透過全市、全省之力發展足球。

呢條真係絕橋!中國足球嘅問題多多,其中一個就係足球學校收費高,有錢仔踢波當興趣,窮苦細路就冇錢受訓。又試想一下,如果中央將考察地方官政績準則,由本地生產總值(GDP)變成本地足球總值(GFP),足球前景係咪一天都光曬呢?

達聞西亦考慮埋環保組織嘅諗法,地方政府唔再起工廠之餘,仲拆晒爛尾樓嚟起球場,咁明年今日北方就唔會再有沙塵暴,你話係咪一舉幾得呢?真係諗起都興奮,如果第日中超會嚟香港上市,達聞西實第一個去抽新股啫。

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads