熱門:

2021年3月17日

達聞西 競技研究院

抖音之亂

Tik Tok即係抖音嘅海外版,近年喺全球大受歡迎,好多球星都有份玩㗎,包括巴塞隆拿球王美斯。不過,達聞西就認真反感啦!聽到扯蝦咁嘅笑聲就火都嚟埋,大部分影片內容無聊到爆,簡直浪費數據同時間。

好彩,愈來愈多國家發現抖音有問題啦!巴基斯坦仲直頭宣布禁用,理由係充斥住不道德內容。但唔同國家有唔同宗教同文化,內地啲阿媽都抖埋一份,阿婆仲「hehehe……」笑埋一份,點會覺得有問題呢?所以,抖音應該向巴國政府據理力爭!

主播圍巴塞

巴塞最近搞掂會長選舉,戰績亦逐漸回穩之際,突然爆出抖音之亂。話說,當地好多球迷攞住手機拍片,訓練營出邊條路車出車入,班網紅衝出挨埋車廂玻璃拍片,好彩班球員簽慣名、手車夠穩,唔係隨時變撞車死亡直播。

危險係一大問題!另一問題係好滋擾,有段30幾萬點擊嘅片,見到美斯黑口黑面對住鏡頭問話:「喂!做咩拍來拍去一樣內容?你哋唔可以重複做一樣嘢啊!咁好浪費人生㗎!」你咪理,影到球王教訓fans,個網紅袋袋平安。

近日愈來愈多巴塞球星黑面短片出現,唔知仲以為球隊內部出現分化添!段段片都係網紅背向球星,跟住球星就乸口乸面,仲做出不耐煩嘅手勢,好似法蘭基迪莊、奧士文尼迪比利、列基佩治都有份扮演張飛、包公嘅角色。

呢班網紅唔單只係冇創意,仲係擺到明抽球星水、吸球星血,點解?美斯呢類巨星嘅代言費、廣告費動輒千萬,你班人打開手機就放上網,賺到嘅錢有冇同人分啊?你拍得好都算啦!千「片」一律,美斯都嫌你哋悶呀!

最可惡嘅係,好多網紅不惜激嬲球員,好似有段片網紅對住奧士文尼迪比利:「好勁啊迪比利……我係指足球遊戲入邊啲數值!」大家都知呢位法國國腳狀態欠佳,賽後一肚火再聽埋呢啲評語,係咪想叫佢入後巷傾吓偈先?

所以呢,做咩都要顧下對方感受,拍片賺錢冇問題啊!不過畀少少誠意同創意做好啲,同埋要睇場合同對方嘅意願,咁拍出來嘅片咪唔會黑口黑面囉。

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads