歧視

「Recollections may vary」，好一個事頭婆，三隻字就突破「歧視」嘅盲腸！講真皇室好注重血統，畀梅根入門已經係好開明，唔通呃你入門然後歧視你咩？哈里啊哈里！呢個世界好複雜㗎，唔好咁天真啦！

種族歧視呢個疫情好嚴重！港超聯最近都出現「病例」，冠忠南區嘅日籍隊長佐佐木周遭理文嘅余煒廉辱罵，據講涉及種族歧視語言。最後，理文公開道歉同內部處分余煒廉，呢單嘢達聞西好好奇。

首先，點樣鬧法先牽涉到日本呢個種族？一般鬼佬玩「瞇眼」係歧視亞洲人嘅典型動作，余煒廉同佐佐木周語言唔通，最多係無禮侮辱對方啫，佢自己都未必知點達到種族歧視嘅層次，唔通做出「手撕鬼子」嘅動作？

所以，達聞西覺得香港足總呢次要深入調查，余煒廉向來惹火同暴躁，但種族歧視係好嚴重同影響港超聲譽嘅行為，一定要查個明明白白，將來先可以避免同類事件，而唔係道個歉同內部處分就畫上句號！

烏龍事件

「諗多咗」嘅烏龍種族歧視事件，最近亦出現卡塔爾聯賽，受害人係日本球員小林祐希，佢投訴球證死亡威脅佢：「you're my opponent, i'm gonna kill you.」日本前國腳本田圭佑都喺網上聲援，一時間群情洶湧。

不過，幾日後小林生就出嚟道歉，話自己將「I'm gonna tell you」，聽錯係「kill you」！咁就真係差之一字、謬之千里啦！個球證白白承受巨大壓力。不過，小林冇死撐或繼續作故仔，而係選擇道歉，的確係抵讚！

呢件事講明一個道理，球場係英雄地，落得場大家都有火，有火就好容易起火，有衝突或互鬧係好平常。如果好事之徒下下上綱上線到膚色、種族，咁個結果就係足球變得政治正確，個禍害隨時嚴重過VAR。

球場事球場了，足球場唔係白金漢宮或溫莎城堡，唔使下下搞到宮廷鬥爭咁，如果大家鍾意睇宮廷鬥，可以睇多啲TVB或內地劇集；不過一轉台睇波呢？唔該唔好將「鬥爭」帶過去！做人簡單啲，唔好亂諗嘢，世界會靚好多。

下一篇：	周日主要足球賽果及主要足球賽程
上一篇：	歐洲三大聯賽積分榜

文章：