情已逝

咩「願有情人終成眷屬」，咩「無論是順境或是逆境，富有或貧窮，健康或疾病，我將永遠愛你……」等等，通通都係最甜蜜嗰刻嘅祝福，結局往往同想像嘅好唔同，唔係情歌、愛情片又點會咁受歡迎啊！

達聞西突然咁感慨，唔係最近感情出現問題，而係收到前皇馬門神卡斯拿斯同太太莎拉離婚嘅消息。呢對金童玉女一個係球星，一個係女體記，簡直係體育傳媒界嘅童話故事。2010南非世界盃決賽賽後訪問，卡斯拿斯情不自禁激吻沙拉一幕，就係世界盃一大經典場面。

一個靚仔一個靚女，由地下情變成公開情侶，之後卡斯拿斯喺皇馬同教練摩連奴鬧不和，其中原因就係莎拉亂爆料，最終會長佩雷斯忍痛將卡斯拿斯賣去波圖。於是，本來可以成為皇馬殿堂球星嘅卡斯拿斯，離開咗土生土長嘅馬德里。

合力戰勝病魔

兩人2016年結婚，有兩個仔仔，典型嘅幸福小家庭。2019年5月全家陷入動盪之中，月初卡斯拿斯操練時心臟病發昏倒，好彩及時送院執返條命。點知剛劏完雞還完神，月底輪到莎拉驗出得卵巢癌，果真係福無重至、禍不單行！

不過，呢對恩愛夫妻做到婚姻誓詞，喺對方病重時互相支持；莎拉陪完老公戰勝心臟手術，輪到卡斯拿斯企床邊為太太打氣！真係做到「無論疾病……都永遠愛你！」正當全世界都認定佢哋打風都打唔甩時，八卦雜誌踢爆離婚真相。

一開頭兩夫婦都否認，但近日雙方喺社交網站承認離婚，但強調雖然身份改變，但彼此嘅友情、親情不變，將為兩個細路建立最好嘅成長環境。卡斯拿斯嘅聲明仲加張幸福合照，不過就將彩色校到黑白，不期然哼起張學友首《情已逝》！

人喺鬼門關前兜個圈，難免對人生觀有改變，加埋呢一年嘅疫下非人生活，真係影響好多人嘅價值觀。莎拉之前擊敗癌魔，但最近突然又喺醫院出現，於是有傳可能癌症已經擴散。真真假假，正如卡斯拿斯所講：「請尊重我哋嘅私隱！」球迷們就唔好亂猜測。

達聞西想祝卡斯拿斯同莎拉身體健康，既然選擇咗各自行自己嘅人生路，都希望佢哋可以搵到美好人生，最緊要係一對細路可以快樂地成長！

下一篇：	周六主要足球賽果及足球賽程
上一篇：	手牽手

文章：