選舉

呢排潮流興講選舉，咁啱巴塞隆拿禮拜日舉行會長選舉，真係又會咁啱嘅？呢場3頭馬車嘅選戰其實無懸念，2003年至2010年會長拉樸達係贏梗！皆因其餘兩名候選人冇政績、冇經驗、冇智慧，充其量係忠誠嘅濕柴！

拉樸達上台嗰7年橫掃國內外錦標，包括3次歐聯冠軍，成功由名帥列卡特過渡到哥迪奧拿王朝。2010年冇得再連任下先由羅素勝出，可惜巴塞亦都進入醜聞同欠債嘅時期，令球員、球迷冇晒face！

根據社交網站嘅趨勢調查，拉樸達已經穩操勝券，皆因佢有輝煌嘅往績，唔似費沙同方特咁白紙一張。好多人提出拉樸達喺2015年大選以1萬幾票之差不敵提前辭職嘅巴杜美，係咪巴塞會員嫌棄佢啊？

六年前競選失敗

當然唔係咁啦！6年前其實係巴杜美好運而已，佢之前係羅素任期嘅副會長，前者因尼馬轉會非法收回佣落台，於是由佢出戰會長選舉，咁啱巴塞攞到三冠王，班會員當然唔會蠢到投票畀拉樸達。

選民係最理性嘅，識得選擇最好嘅人選，大不了5年後再投過嘅啫。正所謂人心隔肚皮，個個都話愛巴塞㗎！但又點估得到羅素手腳唔乾淨，巴杜美請公關公司抹黑自己球員呢？所以話，愛唔係得把口㗎！

巴塞總會員人數10萬鬆啲人，上屆選舉得43.12%出來投票，結果巴杜美攞到25823票，相信巴塞喺欠債、醜聞、美斯續約等風波下，今次投票率一定好高，有王者回歸味道嘅拉樸達分分鐘做歷史票王！

3位候選人中最出位嘅係方特，最大政綱係請沙維回巢領軍，多次批評拉樸達冇具體建議！其實，拉樸達嘅往績就係最好嘅政綱，最近仲暗示會請哥迪奧拿回巢，兼且有辦法說服美斯續約，邊樣唔合球迷胃口先？

至於費沙只係陪跑，皆因呢位律師擔任過前會長羅素嘅發言人，呢個係非常趕客嘅履歷，主要政綱竟然係繼續用朗奴高文：「唔請都請咗，咪繼續教囉！」咁嘅態度都得？巴塞到咗非改革不可嘅時代！

下一篇：	主要足球賽程及周四主要足球賽果
上一篇：	王者榮耀正名之戰

文章：