《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2021年3月5日
大難不死，必有後福？好多人執番條命仔，都會走去買張六合彩，想話迎接福星降臨咁話。不過，咩叫福呢？好似2016年巴西球隊查比高恩斯空難，其中一位幸存嘅機組人員艾榮，周二喺玻利維亞遭遇嚴重車禍，結果又再逃過大難。
咁大難與後富嘅關係就好玄妙啦！如果艾榮係有後福嘅話，就唔使仲逼喺架50幾人嘅大巴，然後成架車碌咗落山，造成21人死、30幾人傷啦！不過從另一個角度睇，如果艾榮唔係有後福，可能已經去咗見上帝啦！所以，福與禍嘅嘢，睇你點面對。
30歲嘅艾榮周二瞓喺病床，右手打石膏、右腳膝蓋以下包紗布，剛走出鬼門關嘅佢，好似中咗六合彩咁，笑騎騎接受傳媒訪問。「當時一路聽住歌，一路迷迷糊糊，突然一陣尖叫，車廂左搖右擺，我張開手臂揸實扶手，身體頂住車窗，保持平衡。」艾榮講道。
奪命車禍
其他乘客冇危機意識，一味叫救命唔識自救，「成架車360度旋轉，好多乘客好似入咗洗衣機咁！」艾榮回憶道。艾榮全程保持清醒，等到架車穩定落嚟，先自己爬出車外。「簡直唔敢相信……但凡事總有原因，不管係好事定壞事！」
相比當年嘅九霄驚魂，呢次車禍算小兒科。艾榮回憶空難好似見到神蹟：「我聽到風嘅聲音，外面雨水灑落機艙，引擎熄咗漆黑一片，成架機自由落體，一切好似一場夢，一場噩夢！到我醒來，見到一片狼藉……呢次係神話我知，聽到我嘅禱告。」
艾榮再次大難不死，佢屋企人當然又係嚇餐飽啦！姐姐盧絲雅講：「擔心死我啦！好彩佢情況穩定，係手腳受傷啫！我已經同佢通過電話，佢話自己冇咩大礙。多謝神再一次打救佢。」相對車禍死難者嘅家庭，艾榮真係非常之幸運。
4年幾前嘅空難，係人禍多於意外，當時艾榮同其餘5名生還者追求真相，最後調查報告判定原因係機油不足，總算查到航空公司嘅責任，還死難者一個公道。其中一名記者軒素兩年前同朋友踢波時心臟病發去世，當年嘅生還者剩低5個。
放大圖片 / 顯示原圖
訂戶登入
| 下一篇： | 絕地反擊 |
| 上一篇： | 原始人飲食法（上） －－科研報告 |
