咁上心做咩？

男兒有淚不輕彈，華倫西亞中堅基比爾包列斯達，成個「大儍」成奎安咁凶神惡煞，上場聯賽作客吞基達菲三蛋，賽後接受訪問竟然流下英雄淚，為咩呢？原來係球隊面臨降班威脅，為隊波咁上心係好事，不過都要諗下值唔值得。

華倫西亞班主林福榮2014年入主球隊，初期都keep到成績，可惜好快就唔係幾肯科水，教練炒啊炒，球星走啊走，曾經嘅西甲前列分子如今變咗倒數第八嘅下游球隊。基比爾包列斯達見到球隊敗響自己手，覺得自責、內疚同不忿。

又如何呢？太子女林慧俐之前同球迷嗌交，已經講明：「你班人唔好唔記得啊！隊波我哋買咗㗎，鍾意點搞都得！」嘩，林先生真係要教下阿女啊，唔好一副有錢就大晒先得㗎，呢個世界好多嘢係錢買唔到嘅！

太子女無情

成績差又遇上新冠疫情，真係天都幫球迷懲罰林家啦！總負債由之前嘅3.65億歐羅，增加至5.6億歐羅，達聞西或者覺得好大數目，可能喺林慧俐呢類富二代心中，不過係去少幾次海洋公園條數就喺番度，呢啲就係層次同眼界嘅差別！

仲有件事反映到林家幾咁涼薄，就係阿根廷中堅加雷舊年確診新冠肺炎，球會唔單止冇噓寒問暖，仲趁佢養傷同染病期間，解除合約騰出個外援位，等球會請番個好球員。你話咁不近人情嘅球會，你畀個心佢咪盞當狗肺？

基比爾包列斯達喊完，第日喺社交網站澄清係一時激動，強調繼續作戰到底，直至協助逃離降班命運。呢隊蝙蝠兵團近20年喺歐聯名氣甚大，僅次皇家馬德里、巴塞隆拿同馬德里體育會，如果真係最後要降班，對西甲聯打擊認真大。

按照目前球隊士氣嚟睇，情況唔係幾樂觀，教練查維加西亞有傳日內會收到大信封，若果係真嘅話呢，將會係近3年第3位被炒嘅教練。華倫西亞喺2021年9場西甲贏得3場咁大把，近4輪搶得4分，好容易就跌落降班漩渦。

達聞西就勸基比爾包列斯達的起個心肝，抹一抹眼角嘅淚水，本住良心打多啲好波，護級嘅嘢交畀上帝，起碼自己可以搵個新東家吖嘛！

下一篇：	止血
上一篇：	歐洲三大聯賽積分榜

文章：