《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2021年3月1日
「三叔」黑仔達、海大富……，周六逝世嘅諧星吳孟達好多角色深入民心，但對國際球壇最深刻係《少林足球》嘅「黃金右腳」明鋒。2001年呢套結合少林功夫和足球的電影，令香港足球電影風靡一時。
《少林足球》當年食正2002日韓世界盃條水，香港票房收超過6000萬，2002年先殺入歐洲市場，2002年6月27日響俄羅斯上映，最遲係2005年6月嘅西班牙。其中，2003年4月喺意大利上映嗰陣，第一個周末榮登票房榜首。
當時意甲仲係第一聯賽，當地電影公司認真有諗頭，搵咗首都兩大勁旅拉素同羅馬嘅當紅球星配音，主角阿星由湯馬斯配音，二師兄係米赫洛域、大師兄係迪維基奧，而吳孟達就由藝人恩仙奴聲演。
紅遍歐洲各國
呢套作品全球票房高達5000萬美元，其中意大利市場收168萬歐羅，至今都係華人電影喺當地嘅紀錄。雖然呢套電影喺電視嘅人氣不及電影院，但依然係歐洲電視台重播率最高嘅星爺作品。可以講，少林足球拉近歐洲同香港電影嘅距離。
歐洲人本來對李小龍同中國功夫已經着迷，呢套《少林足球》將足球運動融入中國功夫，實在係捉住歐洲人嘅兩大愛好。自從套戲上完之後，只要歐洲球賽有暴力嘅場面，傳媒都會以踢「少林足球」嚟比喻一番，你話香港文化幾有面呢？
可惜嘅係，雖然星爺用上「少林」呢兩個字，以為可以踢入埋大陸嘅10幾億市場，可惜偏偏被國家電影局拒諸門外，原因係未審批就喺香港上咗！聽講當年仲影響埋電影公司喺內地嘅業務添！嘩！乜方丈當年已經咁小氣？
不過，電檢局攔得住電影上映，又點攔得住內地人朝拜呢套經典作品？「做人如果無夢想，同條鹹魚有咩分別？」、「裁判、助理裁判、足協、足總、足委，全部都係我的人，點同我打呀？」等金句，到今日都仲紅遍神州大地。
對意大利足球嚟講，電影入邊嘅「黑哨」、「假波」等問題，2006年真係喺現實世界曝光，電話門主角嘅祖記更加要降班受罰，意甲自此失去世界第一聯賽嘅地位，而吳孟達同星爺亦自此分道揚鑣！
放大圖片 / 顯示原圖
訂戶登入
