搖滾變奏

達聞西今季一路諗緊個問題：到底紅軍買堤亞高艾簡達拿，係幫到球隊定害咗球隊呢？一路都未敢下定論住。法國名宿雲加周二睇完歐聯十六強紅軍2比0擊敗RB萊比錫，賽後講出自己嘅睇法，值得同大家分享下。

教授話：「過去紅軍中場好進取同侵略性，領隊希望提升球隊實力，於是引入技術型球員，但咁樣反而減低中場強度。今日佢哋就好難搶返個波，所以呢，有時你想改善球隊，反而會失去一啲嘢。」

高普有唔同睇法，覺得球隊制服到RB萊比錫呢隻怪獸，「對手喺德甲好體力化，往往用速度同緊逼KO對手，我哋呢場波就完全制服到佢哋。」咦！果然立場同身份唔同，係會睇到截然不同嘅「真相」。

達聞西覺得高普想改變球隊，唔希望繼續逼圍搶嘅打法，於是引入艾簡達拿加強中場控球，點知好衰唔衰遇上傷兵潮同低谷，於是大家咪歸咎艾簡達拿囉！到底高普係「升呢」定「降呢」，都係睇多一排穩陣啲。

紅軍改風格？

紅軍名宿奧雲睇法同達聞西相似，佢話：「佢係全英超最獨一無二嘅球員，可惜加盟一支並非處於最佳狀態嘅球隊。」冇錯啦！當一支球隊傷兵滿營，後防失誤多、前線失機多，冇理由要個中場球員嚟承擔責任啩！

高普足球係硬搖滾（Hard Rock），艾簡達拿屬於鄉村音樂（Country Rock），樂隊要轉型難免有磨合期，甚至樂迷接唔接受到都係疑問。咁高普係樂隊嘅監製、作曲兼填詞，當然係佢話事，有咩鑊都由佢孭啦！

其實呢，如果一樣嘢夠好就唔使變，一變自然失敗同成功五五開，怕失敗不如行番舊路。高普贏盡所有錦標，唔甘心球隊裹足不前，於是引入艾簡達拿變風格，唔理最後成功定失敗，呢種精神都值得鼓掌。

講返周二對RB萊比錫場波，紅軍實在贏得夠運，穆罕默德沙拿同沙迪奧文尼嘅入波來自對手嘅犯錯，所以話好波不如好運，紅軍今季國內比賽黑過墨斗，睇嚟歐聯運氣幾唔錯，睇下可唔可以攞返個冠軍？

下一篇：	周二主要足球賽果及主要足球賽程
上一篇：	麥巴比謀朝篡位

文章：