跪地餼豬乸

剛踏入牛年，相信大家都想盡快除口罩，享受返正常嘅社交活動，亦都希望英超快啲畀球迷入場，咁樣比賽先至有氣氛。而對水晶宮黑人球員韋費特沙夏嚟講，佢就最希望賽前唔好再搞單膝下跪儀式啦！咁又係啊，點可以跪住爭公義㗎？

呢個BLM（黑命貴運動），係舊年從美國傳到英超，英超明明有「No Room For Racism」運動，點知班球員好似跪上癮，個個禮拜開波前都要跪，終於由沙夏第一個做「醜人」，公然話呢種儀式係偽善行為，兼且對抵抗歧視毫無幫助。

「點解要下跪或着T恤，先可以表達到呢？簡直貶低成件事。所以，我已經唔再出席BLM活動同訪問，除非整體種族歧視問題有改善，否則我唔會再做呢類虛偽嘅嘢！」沙夏痛斥道。

一切係為咗利益

成個下跪運動，最得益嘅係咩人呢？咪美國總統拜登同社交網站囉！「成日有人開假account，喺社交網站肆意歧視黑人，點解呢啲公司可以容許呢類行為呢？」沙夏點名批評Twitter嘅CEO多爾西同fb教主朱克伯格。

咁又係喎，呢類社交網站連真假新聞都分得到，甚至隨便cut人哋account，甚至你search過咩內容，第日就推薦啲廣告畀你。點會搞唔掂網上種族主義分子啊，係咪跪地餼豬乸啊？

係啦！好似中央電視台今年個春晚，又再搵廣場大媽、公園阿叔，油黑塊面扮非洲黑人同埃及人表演，唔知點解NBA頭號BLM主將勒邦占士，以及籃球壇頭號華裔運動員林書豪都扮睇唔到？

一切嘅一切咪又係為咗利益，政客為選票、明星為市場，KOL為呃like，入咗白宮、錢過咗數，緊係睬你都儍啦！美國首位黑人總統奧巴馬，執政8年又為黑人爭取過咩權益呢？真係嘥氣！

呢個世界起哄嘅人多，一個二個驚死執輸，係唔係都跪咗先，反而美國國內一啲職業聯賽，有好多球員選擇唔跪，呢啲咪真正嘅表達自由囉！邊似得英超球壇咁盲目跟風嘅啫。不過，好彩愈來愈多人醒覺，英冠球隊賓福特之前都話唔再玩下跪遊戲啦！

選文：達聞西

下一篇：	周一主要足球賽果及主要足球賽程
上一篇：	翻生白堊紀

文章：