年廿八赤口日？

禮拜二係年廿八，傳統上應該係洗邋遢，可能疫情下多咗時間喺屋企，平時執執埋埋、掃掃埋埋，到咗呢一日就做少好多功夫。咩時代都有利弊，疫情導致人與人之間隔層口罩，呼吸本來就唔係幾順，脾氣固然好似甦醒火山咁，隨時日日都係赤口啊！

咩唔係啊！意大利盃國際米蘭作客祖雲達斯，教練干地重返効力10幾年嘅舊東家，居然同祖記舊部下嗌交，兼向對方會長、舊老細安尼利豎中指，咁樣黎克特製十級大地震，用赤口日嚟比喻，真係一啲都冇誇張到㗎。

發爛渣辱舊主

干地心情躁好正常，皆因球隊財困拖緊糧，歐聯出局、聯賽排第二，意大利盃首回合落後1比2，呢場贏唔到3個冠軍剩得一個，唔緊張就假啦！不過肉緊還肉緊，都要保留一啲理性同冷靜，唔係就變咗街市佬嗌交，肉鬼酸啦！

好似拿達路馬天尼斯禁區內轉身射門，點知踢落貝拿迪斯治隻腳度瞓低，干地就死都話係十二碼，球證參考過VAR都覺得冇事冇幹，呢個干地就係咁投訴，連祖記舊部下邦路斯都忍唔住：「尊重下球證啦！」

係啦！你估度度球證都好似英超咁渣咩！干地偏偏火遮眼，半場入更衣室經過看台，向祖記會長安尼利舉咗兩秒中指！成個過程鏡頭影低晒，真係毫無風度可言。安尼利賽後就鬧番佢：「收聲啦！xx鬼！」

你睇，上述情景係咪好似赤口行花市，撞到兩個阿叔嗌大交呢？其實，干地球員同執教生涯，都替祖記贏過好多錦標，同安尼利個死鬼伯爺都好感情，既然大家一齊開心過，做咩搞到要中指相對呢？人生短短幾十年，何必呢？

當然，當年干地係辭職離去，可能同安尼利有多少牙齒印，不過，賽後一番說話就唔係幾講道理啦！「我覺得祖記應該禮貌啲，有返少少體育精神，同埋尊重下球圈中人。」干地話。喂！之但係佢半場個中指又點計呢？

躁有咩用呢？最後國際米蘭同祖記互交白卷，兩回合計輸1比2出局無緣決賽。干地壓力真係超級大，有盧卡古、拿達路馬天尼斯、基斯甸艾歷臣等大牌球星，成績都係麻麻哋，今季贏唔到聯賽嘅話，都唔知佢點過呢個牛年啦！

下一篇：	周二主要足球賽果及主要足球賽程
上一篇：	大殺四方

文章：

年廿八 赤口日？