輸淨把口

少說話多做事，真係球壇嘅至理名言，說話最怕唔係返唔到轉頭，而係好似回力鏢咁飛番嚟打中自己個頭。達聞西講嘅係熱刺「寸王」摩連奴啦，周四聯賽0比1不敵舊東家車仔就搞到成頭血。

話說，前幾日摩佬寸車仔新領隊杜慈：「教車仔一啲都唔難，要人有人、要錢有錢，我教兩次都有盃攞，干地、安察洛堤都贏得英超冠軍。」意思即係話畀杜慈聽，執到好籌唔係贏唔到英超啊？同時都借啲意呻熱刺冇人又冇錢。

杜慈贏唔贏到冠軍就未知，不過就作客以1比0擊敗熱刺，上車以來錄得2勝1和。熱刺就慘啦，聯賽已經3連敗，對上嗰次係2012年11月17日，當時熱刺仲以加里夫巴利為領袖，呢次咁啱又係有巴利份，不過呢次就全場坐後備席。

摩佬心情梗係差啦，尤其係失波源自十二碼，以佢A字膊嘅體型構造，當然係卸晒畀球證先生，「全場波嘅關鍵就係呢個判決，好難接受囉！咁樣輸咗場波，個心特別難受同痛苦！對住車仔輸十二碼，點有得救啊！」摩佬肚痛咁嘅表情講。

唓！摩佬真係當全世界都冇睇場波咩？車仔控制大局，熱刺最多係完場前谷過一段，講到好似輸得好唔抵咁，使唔使咁好演技啊？TVB搵曾志偉回巢救亡，考慮下上去「獎門人」節目做嘉賓啦！收視一定飆升㗎。

近日東奧組委會主席森喜朗因唔尊重女性言論要道歉，摩帥賽後都唔多尊重女記者賓達，佢問：「點解唔派巴利落場呢？」摩帥居然當住所有記者話：「呢個係好問題，不過，你唔值得我畀答案！」小心女權人士搞大遊行啊！

向記者發洩

奇怪嘅係，同一個問題由其他記者問，摩帥就勉強回答：「我盡力而為，巴利都盡咗力，人人都全力以赴。」答到咁鬼語無倫次，證明賓達嘅問題篤到痛處，佢一時唔識答就出言奚落，真係冇乜風度，不過有風度就唔係摩佬啦。

摩佬今仗真係輸淨把口，又怨球證、又怨傷兵，就係冇怨到自己。其實車仔好易教，熱刺又有幾難教呢？普捷天奴靠提拔新人補充實力，第二季起到2018/19球季，聯賽排名從未跌出過前4，摩佬今季第二季教排緊第8，真係要加油啊！

下一篇：	亞洲玩完
上一篇：	人腦不及電腦快

文章：