熱門:

2021年2月3日

達聞西 競技研究院

買買買 賣賣賣

一場新冠疫情,打亂幾多如意算盤?中資持有嘅意甲豪門國際米蘭,背後金主係蘇寧集團老闆張近東,球會主席張康陽連日來不斷洽談賣盤,想劈低呢件昂貴嘅玩具,可惜談判宣告失敗,又要面臨債主上門嘅下場。

2016年,張近東以2.6億歐羅買咗國際米蘭68.5%股份,翌年李勇鴻入主AC米蘭,米蘭雙雄盡歸中資,當時係中國資本「走出去」嘅高峰,2015至2017年就有10幾間歐洲球隊改姓「中」,包括馬德里體育會、愛斯賓奴等。

收購名牌球會好處多多,首先馬上做咗國內名人,好似蔣立章高調入主破產嘅帕爾馬,由原本買60%股份減至30%,最後連區區270萬歐羅都畀唔出,做咗幾個月風頭躉最終取消交易。當然佢係真心想買帕爾馬,但點解最後唔夠錢呢?

5年前,央行高層已批評投資海外球會欠理性,隨之而來係實施外滙管制,導致呢幾年中資紛紛撤離歐洲球壇。萬達集團兩年幾前就出售馬體會17%股份,只係保留主場館冠名權,目前較有名氣嘅就剩低國際米蘭同愛斯賓奴。

中資撤離歐洲

有水就你玩足球,冇水就足球玩你。蘇寧集團連續6年利潤見紅,短期同長期債務以百億、千億人仔計,仲邊有錢畀張康陽玩國米呢?曾經有「國民老公」之稱嘅王思聰呢幾年低調咗,咪又係因為老豆王健林手緊囉。

國際米蘭呢件「玩具」唔易放手,同英國財團BC Partners傾咗好耐,初初都傳出好大機會成交,皆因國米已經冇錢出糧,11、12月人工延至季後先找數,呢個反而要多謝疫情,令意甲聯賽會額外開恩,唔係會扣分兼罰款㗎。

蘇寧呢幾年使咗5.5億歐羅,如今希望標價7.5億歐羅連債務放盤,但係疫情形勢未敢樂觀下,未知幾時先畀球迷入番場,邊有買家肯接呢個燙手山芋啊?國米亦承認談判失敗,但強調仲有好多潛在買家,會繼續慢慢傾。

不過,同市嘅AC米蘭就坐唔安食唔落啦!皆因米蘭市議會擱置咗主場嘅興建計劃,話一定要等埋國米大股東塵埃落定,先會畀兩間球會開始動工,今次AC米蘭真係無辜辜啦!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads