熱門:

2020年11月23日

達聞西 競技研究院

金童布歐

多蒙特嘅20歲挪威超新星夏蘭特周六雙喜臨門,唔單止喺5比2大勝哈化柏林場聯賽射入4球,仲當選2020年歐洲金童獎,係首位獲得呢個榮譽嘅挪威人!佢一直被比喻為日本漫畫《龍珠Z》嘅魔人布歐,如今多個花名叫金童啦!

執到寶嘅多蒙特都改圖賀賀佢,見到夏蘭特扮出緊龜波氣功,果然係一支好有童真嘅勁旅。今年個金童獎競爭非常激烈,夏蘭特以302票獨領風騷,第二位巴塞前鋒安素法迪得239票,拜仁慕尼黑後衞艾方素戴維斯以226票得第三。

夏蘭特今年一月由薩爾斯堡紅牛加盟多蒙特,估唔到紅嘅速度快過染髮水廣告,30場聯賽同歐聯射入31球,今季仲更加得人驚添!上陣12場入咗15球!照咁嘅入球量落去,以2000萬歐羅買佢番嚟嘅多蒙特,將來實發過豬頭。

呢位小將難得在夠成熟,周六16歲隊友尤素法莫高高處子亮相,佢賽後就敲鑼打鼓讚對方:「佢係當今最有天賦嘅球員!今年先得嗰16歲零1日!我今年已經20歲,同佢比實在太老啦!長江後浪推前浪啊!……佢將來大把世界。」

攞獎sell隊友

新鮮出爐金童獎得主變身街市賣魚佬,搏命sell自己嘅新晉隊友,而唔係妒忌、眼紅或阻佢上位,呢啲球員去邊度搵啊?佢仲識得同教練法夫利講笑:「佢問我係咪入3球,我話唔係你換走我點止入4球?」85分鐘莫高高入替夏蘭特,打破德甲最年輕球員上陣紀錄。

混跡球壇唔係一味講球技,人品、球品同樣重要,2010年金童獎得主巴洛迪利就係反面教材。2017年得主基利安麥巴比最近又有負面新聞,話說佢周五作客倒戈2比3負摩納哥場波,梅開二度後錫聖日耳門嘅隊徽慶祝,呢種反骨仔行為惹起公憤,造就摩納哥下半場連入3球!

好多球員倒戈會講明唔慶祝,希望尊重同感激母會嘅栽培。呢種得人恩果千年記嘅精神,都喺夏蘭特身上體現得到。佢「大四喜」之後話自己半場飲能量飲品,所以下半場好似裝咗對翼咁!擺明幫前球隊薩爾斯堡紅牛隊嘅老細賣廣告。

好波又好品嘅賀蘭特只要冇咩大傷痛,未來10年都係球壇嘅魔人布歐,等新冠疫情過去球市一復甦,多蒙特轉手賣出去起碼賺成億!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads