熱門:

2020年11月17日

達聞西 競技研究院

一拳出成千古恨

人生最大嘅遺憾係乜嘢?應該係女神出嫁了,可惜新郎唔係你,而對於威爾斯國家隊領隊傑斯嚟講,人生最大遺憾莫過於球隊贏波了,可惜領隊唔係自己!威爾斯周日歐國聯分組賽主場1比0擊敗愛爾蘭,周三主場只要打和芬蘭就可以殺入決賽周,傑斯嘅遺憾只會愈來愈大。

心情唔好最適合行山,望下天地可以悟人生,不過千祈唔好走去擒纜車塔,搞到人哋半天吊就唔好啦!傑斯因打女友被捕獲釋後,成個11月都要交出兵符,無所事事下約3個朋友同隻狗行山,只見其他人笑口噬噬,只有呢位曼聯名宿笑唔出,愁到爆。

又難怪嘅,接手威爾斯嘅助理領隊柏治交到貨,上場友誼賽0比0打和美國,周日仲贏埋愛爾蘭,記得10月中傑斯領軍作客都柏林打成0比0,柏治會唔會趁機搶埋個帥位呢?如果係嘅話,傑斯就面臨三失:失戀、失業、失形象,不過又可以怨得邊個呢?

隨時面臨三失

達聞西八到傑斯同時一腳踏幾船之餘,當晚仲同女友凱特及另一名女子起衝突,換句話講係雙拳力敵二女,咁嘅情況都可以打傷前女友個嘴唇,可見呢位名宿嘅戰鬥力依然強勁。可惜啊!贏咗場交、輸咗頭家,仲入埋雜差房,兼面臨三失嘅下場,真係一拳出成千古恨啦!

唔衰都衰咗啦!傑斯惟有求神拜佛威爾斯足總唔好炒佢,不過最後結果都要睇下柏治嘅表現。46歲嘅柏治細傑斯1年,不過國家隊履歷好好多,2017至2019年執教威爾斯U21,好多目前嘅主力都係當年舊部,唔怪得知可以擊敗愛爾蘭啦!

柏治唔似傑斯咁情緒化,講嘢仲好有分寸添!記者問佢傑斯嘅角色,佢答:「我隨時可以打電話請示佢,但佢好放心交畀團隊負責。呢隊波永遠係傑斯嘅,我哋只不過延續佢嘅部署,盡心盡力完成佢定落嘅目標!」你睇答得幾圓滑?記者好難搵到位入。

達聞西當年都好欣賞傑斯嘅踢法,見到佢執教之路行得幾順,都希望見到佢可以正式入主奧脫福,可惜經過埋呢次打女友醜聞,形象簡直無可再差,睇嚟領隊生涯都係咁先啦!

 

放大圖片 / 顯示原圖

訂戶登入

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads