《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年11月9日
英國新冠肺炎疫情再度爆發，首相約翰遜上周宣布再封城4個禮拜，希望可以有效控制疫情啦！正當人人聞疫色變之際，車仔新星赫臣奧杜爾就唔多生性，流出上月底喺家中開P嘅片，疑似第二度違反抗疫令！搞到車仔不知幾尷尬。
呢位20歲翼鋒係第一批球壇確診者，早喺今年3月已經感染病毒，康復後兩個月召艷舞女郎上門，結果被傳媒踢爆違反抗疫令，令車仔同領隊林伯要公開道歉。勢估唔到6個月之後，赫臣奧杜爾再次同隊友湯姆利居家開P。
身邊好友都替赫臣奧杜爾擔心：「車仔一定激到生蝦咁跳，呢次實在太過分啦！因為咁自己都中過招，應該好好遵守防疫令。全國上下都唔准請朋友仔返屋企，佢憑咩可以有特權啊？」呢位知情人士咁火滾，係咪赫臣奧杜爾冇請你啊？
從網上流傳嘅片段，睇到當時班人隊酒高歌，不知幾high，湯姆利仲叫赫臣奧杜爾講信用卡密碼找數，斷估都唔會係第一次。車仔上次因球員確診搞到要全隊隔離，最近德國國腳夏維斯都中埋招，認真係一波未平一波又起！
兩度違反防疫令
呢個赫臣奧杜爾又真係好唔醒目，今季喺迪姆華拿、薛耶治加盟下，佢已經冇咗個正選位置，咁都唔識得搏命練習爭表現，居然爆出違反防疫令嘅醜聞，試問林伯又點會重用你呢？車仔目前嘅翼鋒球員多到瀉，好心生下性啦！
英格蘭國腳基爾獲加就值得表揚啦！呢位30歲後衞今夏違反過防疫令，季初表現一度唔多穩定，不過近期表現大有改善，仲逐漸搶番英格蘭國家隊嘅正選地位。呢位球星最近受訪講起呢年嘅高低起伏，懂得珍惜眼前嘅一點一滴。
基爾獲加2019年9月開始無緣國家隊，直到2020年9月歐國聯對冰島先復出，點知佢整個兩黃一紅出場。「冇之前發生嘅唔愉快事件，就唔會有而家嘅我。」獲加唏噓講道。的確，佢10月不但重返國家隊，球會表現都更進一步，深得領隊哥迪奧拿嘅信任。
所以話，行差踏錯唔緊要，最緊要識反省同汲取教訓，正所謂塞翁失馬焉知非福吖嘛！希望赫臣奧杜爾得閒搵基爾獲加傾下，咁樣對球員生涯會好有幫助。
放大圖片 / 顯示原圖
訂戶登入
