《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年10月29日
人有三衰六旺，球隊亦唔例外，呢幾年好紅嘅利物浦，最近就頭頭碰着黑啦！後防支柱雲迪積克重傷收咧，巴西防中法賓奴客串中堅似模似樣，周二歐聯2比0贏米迪蘭特又傷埋，嚟緊賽事都唔知搵邊個頂。
紅軍目前得祖高美斯一個正式中堅，雲迪積克同祖爾麥迪比分別受傷，球員名單得番18歲嘅荷蘭小將薛比雲丹貝治，以及19歲嘅英格蘭U21國腳里斯威廉斯。高普周二就派里斯威廉斯上陣，表現總算中規中矩。
里斯威廉斯身高1.88米，係利物浦土生土長嘅青訓產品，上季外借到地區球隊京達米士特，出場26次入1球。今季紅軍收番嚟自己用，9月英聯盃對林肯城拍住偶像雲迪積克打正選，再之前就係歐聯對阿積士後備上陣幾分鐘。
有潛質還有潛質，今季英超形勢大亂，每一場波都好緊要，高普都有啲猶豫不決。「麥迪比又未ready，里斯威廉斯表現唔錯，但周末就要對韋斯咸，唔知佢夠唔夠時間適應呢？」高普個心囉囉攣。
好彩，巴西門神艾利臣周二正式復出，成條後防線當堂定晒，試諗如果呢場係阿祖安把關，雲迪積克30分鐘就出場，紅軍禁區究竟會亂成點？一條防線最緊要係領袖，有艾利臣睇住個場，高普唔使咁擔心嘅。
既來之則安之，利物浦球迷都要學識面對逆境，唔好做出令球隊蒙羞嘅嘢。愛華頓門將比克福特之前踢傷雲迪積克，連日來遭到死亡恐嚇同網上滋擾，結果要搵保鑣保護家人，仲唔敢上社交網站以免暴露行蹤。
後防線當堂定晒
乜咁大件事啫？踢波嘅嘢緊有碰撞，何況比克福特都道歉同問候番，紅軍網上支持者使乜激動？比克福特個動作係硬朗咗啲，但佢係全心全意想攔截，都係一時肉緊出腳狠咗，何必咁咄咄逼人呢？
與其記住唔開心嘅事，不如留意下「稻草人」里斯威廉斯，佢個髮型認真獨特，好似頭頂擺咗紮草咁，希望第日英超落到場唔好變稻草人啦！近年紅軍湧現阿諾特、居迪斯鍾斯等本土新星，里斯威廉斯把握到呢個上位機會，將來大把前途！
放大圖片 / 顯示原圖
訂戶登入
