《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年10月28日
眨下眼，全球社會進入全球化vs反全球化嘅階段，究竟國與國之間、陣營與陣營之間，會係你走你嘅陽關道，我走我嘅獨木橋，定係喺財路上殊途同歸呢？達聞西諗起呢個劃時代嘅時刻，心頭都為之一震，好似睇緊決賽互射十二碼咁。
呢期最hit新名詞叫「內循環」，達聞西都要叨下光應用下！話說紅魔鬼曼聯領隊蘇斯克查，日前話23歲中場雲迪碧克要試下打左翼：「佢係叻仔，加埋阿積士出品必屬佳品……我當年都打過右翼、左翼、十號位啦！」
蘇帥將用實際行動示範咩叫足球內循環！結果係點？大家放長雙眼啦！記得雲迪碧克今夏加盟曼聯，達聞西已經話唔知買嚟做乜？同進攻中場般奴費南迪斯撞晒。結果呢？新球季聯賽踢得59分鐘，變咗後備席嘅必然主力。
由中場中改打左翼，據講雲迪碧克願意去嘗試，呢個態度值得一讚，不過，肯唔肯同得唔得係兩回事。呢位荷蘭新星速度同突破能力都麻麻，之前喺阿積士同荷蘭都係中路派牌，有機會就殺入禁區建奇功，同翼鋒個角色相差太遠啦！
蘇帥畀個咁騎呢位佢踢，無非想話機會畀咗你，把唔把握到就睇閣下道行。曼聯呢啲伎倆呃到雲迪碧克，又點呃到雲巴士頓？呢位名宿話：「佢上錯賊船啦！」
透過買賣互補不足
曼聯名宿艾拉都睇唔過眼，「其實點解要買雲迪碧克呢？我對佢冇私人恩怨，你擺佢喺後備席，證明球隊唔需要佢。」點解？咪因為副總裁活禾特覺得4000萬英鎊轉會費抵囉，覺得疫情價唔買就笨吖嘛！就係咁多咗一個後備球星。
邊得咁多內循環啊！全球化最大好處係眼望國際，透過買賣互補不足，攜手向前。好多人走精面做壞規矩，出現唔同嘅問題，但係都唔代表從此要閂埋門。所以，達聞西衷心希望國際社會盡快恢復正常。至於紅魔鬼嘅中場內循環就亂晒籠啦！蘇帥整整下重用費特同麥湯米尼打雙防中，般奴費南迪斯打進攻中場，連法國巨星普巴都要做後備啊！可見，錢可以解決嘅問題唔係問題，不過錢製造出來嘅問題？就認真係大問題！睇下蘇帥點拆啦！
放大圖片 / 顯示原圖
訂戶登入
