一代宗師

俄羅斯MMA（綜合格鬥）之王「卡比」紐曼高莫杜夫，禮拜六喺第二round已經擊敗美國選手加耶迪，閃電式贏得UFC輕量級賽事冠軍。大家嘅歡呼聲都未停，呢位32歲宗師突然宣布退出武林，一時間鴉雀無聲！

達聞西都當堂呆咗，因為等住睇佢再打鑊金嘅愛爾蘭「寸王」麥佳格，如今冇得再大快人心啦！不過，聽埋卡比退出江湖嘅原因，相信讀者們都會好感動。事關佢阿爸今年7月因新冠肺炎逝世，之後佢應承阿媽退出擂台。

「多謝跟隨爸爸10幾年嘅兄弟！我今日宣布退出MMA，因為實在唔慣冇爸爸喺場邊。我同阿媽傾咗3日3夜，佢唔想我單獨行呢條路，我答應咗佢！所以呢場係最後一場！」卡比邊講邊流下英雄淚。

收山陪阿媽

呢場新冠肺炎令卡比明白到，乜嘢冠軍、咩意氣之爭，都比唔上家人同親情緊要。「如果大家有屋企人，就多啲時間陪下佢哋，我而家得番個阿媽，我想多啲陪佢。」卡比明白到子欲養而親不在嘅遺憾，真係鐵漢柔情啊！

卡比嘅爸爸叫阿都馬納，細細個已經學摔跤，大個仲加入埋蘇聯軍隊，學埋柔道、散打等。退役之後開健身同摔跤中心，所以卡比細細個已經好打得；阿都馬納本身亦係綜合格鬥教練，阿仔自然十八般武藝樣樣皆精啦！

阿都馬納仲係卡比嘅教練同朋友，感情好到不得了，所以月前突然離世對呢位MMA宗師簡直係晴天霹靂，於是就產生咗收山嘅念頭啦！不過，對MMA愛好者同主辦方嚟講，就係無可再壞嘅消息啦！

卡比唔單止好打，仲好有原則同信念，好似把口唔收嘅麥佳格咁，兩年前就侮辱佢爸爸同祖國俄羅斯，結果喺擂台畀佢打到狼狽不堪，4個回合已經扯白旗投降！嗰場比賽睇到fans幾興奮啊！

記得卡比賽後仲教埋麥佳格做人，話行走江湖唔好咁口臭，要識得尊重他人。相比麥佳格得把口兼人品差，卡比就真材實料得多！呢次告別戰仲係帶傷上陣，皆因幾個禮拜前斷腳骨入醫院，幾硬淨啊！

有料之人自然廣受尊重，葡萄牙球王基斯坦奴朗拿度都話以佢為榮！卡比出戰UFC賽事12年，獲得28戰全勝嘅成績，唔知幾時先出到下一個接班人呢？

下一篇：	飛馬慘食五蛋
上一篇：	13比0

文章：