《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年10月14日
NBA名宿「巨無霸」奧尼爾夠晒份量，日前喺網上頻道宣布獻出「第一次」——以郵寄方式投下美國總統選舉嘅神聖第一票！好多網民見到都O晒嘴：「作為美國人，竟然從來冇投過票？！」係我哋搞錯啫，唔投票都係自由嚟嘅！
「我做節目好誠實，我之前從來冇投過票，呢次係第一次，It feels good!」佢笑到四萬咁口。佢之前參與鼓勵投票活動，個活動由前第一夫人米歇爾推動，希望多啲人出來投票！既然呼籲得其他人投票，自己冇理由唔投嘅！
「眾所周知，我從來都唔係偽君子！講得出自己都要做得到，呢一次大家記得投票啊！」奧尼爾喺Twitter寫道。至於投侵侵定係釣魚Joe呢？呢位球星就死都唔肯講，費事以自己嘅影響力，左右咗其他人嘅選擇啦！
球迷之所以驚訝，係因為奧尼爾同奧巴馬好老友，經常喺網上發表支持對方嘅言論，好似今年季後賽總決賽嘅看台，呢對阿肥與阿瘦就並肩而坐！咁老友鬼鬼，奧尼爾之前都唔用選票支持奧巴馬？簡直係政治冷感動物啦！
奧尼爾撐莫利
達聞西估佢第一次投票同「黑命貴」運動有關，因為奧尼爾曾經公開批評侵侵未能解決警暴問題！哎，侵侵喺警暴呢一part的確失咗好多分，都唔知有幾多人好似奧尼爾咁，決定走出來投下人生第一票？釣魚Joe恰緊眼瞓都笑醒！
話又說回來，釣魚Joe抹完口水好醒啦！侵侵喺中國問題上贏好多分，好似火箭隊總經理莫利支持香港示威者，結果搞到被內地全國批評，仲一度cut埋NBA嘅中國區轉播。記得湖人隊球星勒邦占士批評莫利多嘴怪，奧尼爾反而撐莫利。
奧尼爾當時話：「莫利冇錯！見到世界上有唔啱嘅嘢，我哋就要出聲。應該暢所欲言！」巨無霸冇話同唔同意莫利嘅立場，但誓死保衞佢嘅言論自由！相比之下，提出「中國好遠，唔知咪亂講」嘅勒邦占士就認真虛偽啦！咩叫真正嘅正義英雄呢？就係關心世界發生嘅事，唔清楚就更加要多了解，然後用自己影響力令世界變得更美好，而唔係顧住自己種族、行業嘅權益，對其他人嘅不幸就「漠不關心」囉！
放大圖片 / 顯示原圖
訂戶登入
