《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年10月13日
西班牙「泥地王」拿度禮拜日威到盡啦！喺法網男單決賽直落3盤6比0、6比2、7比5，擊敗世界排名第一嘅迪祖高域，第13次奪得法網男單冠軍之餘，仲以20個大滿貫錦標追平費達拿嘅紀錄！而向來火爆嘅迪祖高域，呢場波更係輸到脾氣都冇埋。
達聞西覺得拿度固然發揮出色，但係迪祖高域全場有52次無壓力下犯錯，間接令呢位泥地王愈打愈順，強勁嘅左手抽擊下下攞命。迪祖高域頭兩盤輸到頭耷耷，第三盤總算有番啲火，點知隨即因失誤好快熄咗。值得安慰嘅係，裁判、司線員都安然無恙。
「我一開波想打亂佢嘅節奏，點知佢早有準備。成個賽事打落嚟，我同大家一樣都覺得自己佔優，結果拿度證明所有人睇錯。我嘗試改變打法，包括改變落點同方向，10個對手9個都會投降，偏偏拿度下下追到，仲回番個靚波攞我命。」迪祖高域講。
呢位「一哥」又唔使灰心嘅，紅土場始終係拿度嘅私家場，全世界得西班牙有天然紅土場咁滯，仲要天氣晴朗少雨水，喺馬略卡島出生同成長嘅拿度，一出世踩住紅土大，邊有得比啊！迪祖高域喺老家塞爾維亞去邊度搵紅土場練波呢？
泥地王非浪得虛名
拿度職業生涯得過47個泥地賽冠軍，分別係13次法網、8次羅馬大師賽、4次馬德里公開賽、11次巴塞隆拿公開賽、11次蒙地卡羅大師賽。咁多屆法網合共輸過兩次咁大把，分別係2015年八強負迪祖高域，同埋2009年十六強不敵蘇達寧。
「我嗰日順到不得了。泥地賽要贏拿度，一定要打得夠主動，唔可以有一絲手緊，一係打出世界波，一係就輸波。落點要攞到盡，佢發球嘅話，你要企近底線，冇人底線抽擊可以贏到佢。」蘇達寧講。講就易啦！泥地王個外號唔係浪得虛名嘅！
不過，34歲嘅拿度可以輕輕鬆鬆擊敗迪祖高域，另一個原因係放棄上個月嘅大滿貫美網賽，全力留喺歐洲備戰法網。細一年嘅迪祖高域唔信邪，結果喺美網第四圈因傷退賽，今次殺入法網決賽又功虧一簣。所以話，到咁上下年紀要收火，疫情下更要識取捨，魚與熊掌往往淨係二揀一！
放大圖片 / 顯示原圖
訂戶登入
| 下一篇： | 上榜首 |
| 上一篇： | 留給這世上你最愛的湖人 |
