手撕哈利卡尼

手撕鬼子睇得多，估唔到仲有手撕哈利卡尼睇！呢位熱刺同英格蘭嘅超級射手，開季7場波無一缺席，得兩場波係後備上陣，近8日更要打4場波，真係鐵人都死！於是摩連奴就溫馨提示英格蘭領隊修夫基，嚟緊國際賽要錫住愛將，結果換來一巴掌——「啪」！

熱刺周四歐霸盃外圍賽7比2淘汰海法馬卡比，哈利卡尼上演帽子戲法，賽後摩帥話：「我向修夫基保證，將來唔畀卡尼打1分鐘熱身賽。」英軍下周熱身賽鬥威爾斯，之後歐國聯對丹麥同比利時，摩佬呢番說話擺明干涉修夫基「內政」。

摩帥干涉國家隊

修夫基亦好唔客氣：「我同佢（摩帥）冇交情，佢從來冇施壓唔好選佢嘅球員！呢次破咗例……我哋唔會畀球員打晒全部3場波，但亦唔保證畀球員唞晒3場。國家隊領隊一向好難做，因為球員都來自大球會，好多領隊亦都太有個性！」

修夫基最後補多句：「希望摩連奴出年4、5月嗰陣，都會悉心照料卡尼嘅體能啦！因為大家都將希望（歐國盃）希望寄託喺佢身上！做人唔好雙重標準！」大家聞到陣火藥味未？卡尼左手畀摩帥拉住，右手畀修夫基扯住，如果兩邊都出盡力，唔出事就奇啦！

所以話新冠疫情新常態下，一定設身處地為對方着想，好似英足總同歐洲足協咁，明知球會賽事密麻麻，好心就唔好搞咁多「傷」身賽啦！歐國聯係咪都應該減少啲呢？口口聲聲為球員着想，咪又係得得把口？新常態應該包括埋國際賽程新安排㗎！

達聞西鍾意「打和啦！Super！」呢句話，呢個世界冇一方係啱晒，亦冇一方係錯晒，只要識得企喺對方立場同角度，就會發現自己唔係絕對啱。所以，「話到口邊留半句，理從是處讓三分」真係做人處世嘅金科玉律，唔使去到咁盡嘅！

呢位摩帥就係衰凡事太盡，把口又唔收！結果同球星、球隊都緣份早盡，之前教車路士、皇馬、曼聯已經係咁，教熱刺初期都有浪子回頭嘅味道，點知今季開季唔係幾順，就攞球星迪利阿里開刀，甚至傳出要離隊嘅傳聞，查實摩帥可唔可以改下啲劇本嘅啫？

下一篇：	鏟到飛起
上一篇：	馬拉松

文章：