新常態得啖笑

足球新常態之下，好多比賽都係得啖笑。好似英超行新手球制度下，球證完全按本子辦事，禁區內波一掂到手就十二碼，完全係唔當球員係人！球證又試下唔張開雙手跳頂或鏟波啊，睇下會唔會變咗海狗？

英聯盃十六強熱刺大戰車路士，迪姆華拿19分鐘為車仔開紀錄，打到75分鐘熱刺中堅艾歷迪亞突然衝出場消失喺球員通道，領隊摩連奴又居然尾隨而去，途中念念有詞，一路跟到入更衣室，你估發生咩事？

原來，迪亞突然人有三急仲係開「大」，擺低幾両就匆匆跑番入場。好彩呢幾分鐘熱刺冇失波，84分鐘仲靠林美拉入波追平，再互射十二碼贏5比4添！摩連奴贏波心情靚，賽後變咗良心領隊兼球員嘅慈父。

「離晒譜！迪亞48小時打兩場波！賽會唔關心球員啫，我嚟關心！咁嘅賽程，人有三急好平常。我不過催佢嗱嗱聲，佢今日嘅表現足以成為典範！」摩帥講。下？踢踢下走咗去，都係典範？

講真啊！賽程密係一件事，摩帥咁體貼球員嘅話，咪唔好畀迪亞出場囉！而且如果比賽密就要去開「大」，英超係咪要考慮加個廁所break呢？當然，迪亞呢場波做咗MVP，場上表現係好嘅！

英超笑料無限供應

「周日打完今日又打，可能因為咁而肚痛。摩帥緊係唔高興啦，但我都冇法子，呢啲嘢邊控制到啊？好彩對手冇乘機入波。」迪亞講。冇錯啦！關鍵係贏唔贏到波，如果輸波？摩帥實唔鬧到迪亞飛起啦！

呢個迪亞真係盡得摩帥真傳，居然真係搵賽程密做藉口，喺熱刺實大把前途，英超笑料亦會無限供應。呢位英格蘭國腳上季英足盃對諾域治，賽後竟然擒上看台搵球迷算賬，結果重罰停賽4場。

講到製造話題，摩帥認第二，冇人敢認第一。今場波佢就喺場邊同林柏特嗌交，聽講仲爆埋粗口添！原來，昔日弟子嘅林柏特笑佢口水多過茶，吵球證仲多過指揮球員作戰，於是咪忍唔住爆粗囉！

難得呢個林柏特EQ夠高，賽後話喺後備席開下玩笑，一啲都冇影響彼此嘅感情。輸波出埋局都冇發爛渣？頭髮發白嘅摩帥，似乎要向「林伯」學下嘢喎！

下一篇：	用心感受
上一篇：	逆轉

文章：