《信報》印刷版出報日為星期一至六。
除以下公眾假期外，其餘日子照常出刊：
休刊日：逢周日及2023年1月23日
至25日、4月8至10日、12月25至26日
《信報》網上版及流動版於休刊日將如常更新每日即時新聞，
敬請留意。
2020年9月29日
「球員有時需要改變……」馬德里體育會前鋒蘇亞雷斯，禮拜日第一次為新球會披甲，後備出場20分鐘就入兩球加一個助攻，以往生猛嘅「咬人蘇」番嚟啦！所以話如果仲有火嘅話，真係不妨走出個「舒適圈」。
「歡迎佢加盟，咁隊波就有人負責咬人，有人負責踢人啦！」馬體會中鋒迪亞高哥斯達賽後講道。呢位西班牙怪獸開波9分鐘就入波，71分鐘被阿蘇換出場，最終球隊6比1大勝CF格蘭納達，第一場波就響勝鼓。
阿蘇之前慘遭巴塞兜腳踢走，尼馬、法比加斯等巴塞名將都替佢唔抵，連美斯都安慰話：「你應該有更好嘅結局，不過以目前呢度嘅情況，我一啲都唔會驚訝！」美斯明寸巴塞高層，達聞西就認真好驚訝啦！
不過，冇話邊個啱邊個錯嘅，只有夾與唔夾嘅啫，巴塞需要改革亦係事實，好似佢哋周日大勝維拉利爾4比0，就成隊波都唔同晒。朗奴高文擺出4-3-3陣式，脫胎換骨嘅古天奴打進攻中場，布斯基斯通同法蘭基迪莊控制節奏。
美斯活力不如前
前線三叉戟一字排開，左至右係安素法迪、基沙文同美斯，17歲嘅法迪梅開二度兼博得十二碼，美斯入一球、古天奴有一個助攻。呢隊巴塞有番以往嘅威力同生氣，最緊要係美斯角色淡咗，其他人發揮機會多咗。
其實，美斯要開始扮演新角色，就好似當年朗拿甸奴扶持佢咁。「能夠同佢合作，係我從細到大嘅夢想，佢場內場外都幫我好多。」法迪賽後好感激偶像美斯。 美斯活力不如前，亦好需要法迪呢類老虎仔幫手衝。
巴塞同馬體會響頭炮，反觀衞冕嘅皇家馬德里唔係幾上力，揭幕戰同皇家蘇斯達打成0比0，禮拜六就險勝貝迪斯3比2，睇嚟會長佩雷斯都要使下錢，買番一兩件好手刺激下隊波，唔係今年都幾難過下。呢個世界冇一本通書睇到老，亦冇一套季季無敵嘅必勝陣容，好似利物浦今年引入堤亞高艾簡達拿，成隊波即刻提升到另一個境界。不過，波夾人、人夾波，好似惡形惡相嘅馬體會同阿蘇加盟就襯到絕，今季一定大把好波睇！
放大圖片 / 顯示原圖
訂戶登入
| 下一篇： | 周日主要足球賽果及主要足球賽程 |
| 上一篇： | 十二碼暴風雨 |
