做人老公甚凶險！

睇波你估就齋睇波咩？咁會失去好多樂趣同得着，46歲嘅前土耳其國腳阿斯克，呢排真係唔慌瞓得着啦！皆因佢太太竟然請殺手攞佢命，仲連埋屍地點都搵好埋，好彩個殺手良心發現，通風報訊先執番條命仔，險過剃頭！

呢單球壇買兇殺夫案錯綜複雜，等閒編劇都未必度到咁嘅橋段。話說，阿斯克同老婆雅摩婚姻亮紅燈，女方出邊有個情夫叫辛古，一日翻雲覆雨過後傾下偈，雅摩講講下居然話：「不如你隊冧個死佬，咁啲遺產就袋袋平安啦！」

辛古一聽當堂呆咗：「下！我咁大個仔，都未殺過人！唔得！」呢位老兄2019年放監出嚟，雅摩估唔到係「鱷魚頭老襯底」，「一次生兩次熟，搵日買隻豬番嚟試槍！」結果，辛古對住隻豬居然瞇埋對眼射，「你都係唔掂！」雅摩講。

千方百計攞佢命

不過，辛古喺監獄識咗個死黨伊亞斯，舊年先逃獄出嚟周圍匿，於是兩個人開車搵對方幫手。伊亞斯一聽就𦧲飯應：「包喺我身上！我之前殺過3個人，唔係都唔會入去踎啦！」雅摩爽快答應酬勞：130萬美元！

雅摩真係相識滿天下，搵到黑槍老細美默買支炮，仲開車搵定荒山野林埋屍，「要掘個窿埋屍好難，一定要搵空曠地方，唔係實引起懷疑。」辛古同警方講。當萬事俱備之際，伊亞斯居然向阿斯克通風報訊，於是一網成擒！

照計伊亞斯唔會良心發現㗎！而且有成130萬美元酬勞，真係打跛腳都唔使憂。唔通佢知對方係土耳其國腳，仲効力過加拉塔沙雷、比錫達斯、費倫巴治等本地勁旅？因為上述幾隊波梗有一隊係伊亞斯嘅愛隊，試問點郁得落手呢？

何況，逃犯伊亞斯殺埋第四個人嘅話，下半世相信都唔使旨意出番嚟，咁銀行有幾多錢都冇用啦！如今棄暗投明隨時將功抵過，番去監獄可能減刑添！所以，成件事最蠢嘅係雅摩，老公遺產化水，3個子女冇咗，真係攞嚟衰！

呢單官司仲打緊，雅摩同辛古被控意圖謀殺，面臨監禁8年嘅刑罰！不過，最傷心嘅一定係阿斯克同班子女，點估得到當年笑笑口行入教堂嘅老婆，居然會為咗家產搵殺手殺自己？做人老公何止艱難啊？直頭凶險添啊！

下一篇：	開季不利
上一篇：	帶刀侍衞

文章：